Qańtarda medsaqtandyrý qory qaraǵandylyqtardy COVID-19-dan emdeýge 1 mlrd teńgege jýyq qarjy bóldi

QARAǴANDY. QazAqparat – 2021 jyldyń alǵashqy aıynda Tegin medıtsınalyq kómektiń kepildik berilgen kólemi (TMKKBK) jáne Mindetti áleýmettik medıtsınalyq saqtandyrý (MÁMS) aıasynda Qaraǵandy oblysynyń turǵyndaryn COVID-19-dan koronavırýstyq ınfektsııany dıagnostıkalaýǵa jáne emdeýge medıtsınalyq saqtandyrý qory 968 mln teńgeden astam qarajat tóledi, dep habarlaıdy QazAqparat tilshisi.

Qordan bólingen qarajat kelesi baǵyttarǵa jumsaldy: ınfektsııalyq statsıonarlarda naýqastardy emdeýge 422,5 mln teńgeden astam, mobıldi brıgadalarǵa aqy tóleýge - 98,9 mln teńge, úıdegi statsıonarǵa - 4,6 mln teńge jumsaldy. Qor PTR-dıagnostıka úshin 442,5 mln teńge bóldi.

«TMKKBK nemese MÁMS qarajaty esebinen koronavırýstyq ınfektsııaǵa PTR-testileýden tegin ótýge ınfektsııalyq statsıonarlarǵa jatqyzylǵan patsıentter;

JRVI jáne pnevmonııa sımptomdary bar azamattar, sondaı-aq kóp beıindi statsıonarlarǵa jatqyzylatyn patsıentter qatysa alady. Bul zertteýge aqy tóleýdi qor Densaýlyq saqtaý mınıstrligi bekitken tarıfter boıynsha jasaıdy», - dep túsindirdi medıtsınalyq saqtandyrý qorynyń Qaraǵandy fılıalynyń bas sarapshysy Janar Raqysheva.

Sondaı-aq, 1,35 mlrd teńgeden astam somany bıylǵy jyldyń qańtar aıynda koronavırýstyq ınfektsııasy bar naýqastardy emdeý úshin medıtsına qyzmetkerlerine qosymsha tólemder qurady. Ústemeaqyǵa qarajat respýblıkalyq bıýdjetten bólinedi. Tólemderdiń mólsheri Densaýlyq saqtaý mınıstrligimen

bekitilgen, táýekel tobyna baılanysty anyqtalady jáne 5-ten 20 ETJ-ge deıin quraıdy. Ústemeaqy alýshylardyń tizimin jedel shtabtar janynan qurylǵan óńirlik komıssııalar qalyptastyrady. Komıssııalardyń tóraǵalary ákimderdiń orynbasarlary bolyp tabylady, olardyń quramyna Óńirlik bas memlekettik sanıtarııalyq dáriger, Densaýlyq saqtaý basqarmalarynyń, úkimettik emes uıymdardyń, kásipodaqtardyń ókilderi kiredi.