Qańtarda qurylǵan Arnaıy operatsııalar kúshteriniń mindetteri qandaı

ASTANA. QazAqparat – QR Qorǵanys mınıstrligi Arnaıy operatsııalar kúshteri qolbasshylyǵy qalaı qurylatynyn jáne qandaı mindetter júkteletinin aıtyp berdi, dep habarlaıdy QazAqparat tilshisi.

«Qańtar aıynda Memleket basshysy – Joǵarǵy Bas qolbasshy Arnaıy operatsııalar kúshteriniń qolbasshylyǵyn qurý týraly Jarlyq shyǵardy. Áskerlerdiń qolbasshysy taǵaıyndaldy, arnaıy operatsııalar kúshteriniń quramyna kiretin quramalar men bólimder anyqtaldy. Olardy qamtamasyz etý, áskerı jáne basqa da tehnıkany tıisti jaraqtandyrý sharalary júrgizilýde. Jeke quram daıyndalyp jatyr», - dedi QR Qorǵanys mınıstriniń orynbasary Sultan Qamaletdınov Ortalyq kommýnıkatsııalar qyzmetinde ótken baspasóz máslıhatynda.

Sonymen birge Strategııalyq damý departamentiniń ókili polkovnık Alpamys Ótepov Arnaıy operatsııalar kúshteri qolbasshylyǵynyń quramyna áskerı bólimder, mekemeler, bólimsheler engizilgenin aıtty.

«Arnaıy operatsııalar kúshteriniń jattyǵýlary birneshe ret ótkizildi jáne Úkimet tehnıkalyq jaraqtandyrýǵa arnalǵan quraldardy maquldady. Onyń negizgi mindetteri: áskerı qaýipsizdiktiń gıbrıdti qaterlerine qarsy is-qımyl, zańsyz qarýly quralymdarǵa qarsy kúres jáne terrorızmge qarsy operatsııalarǵa járdemdesý», - dedi A. Ótepov.

Eske salsaq, Prezıdent Qasym-Jomart Toqaev 2022 jylǵy 19 qańtarda «Qazaqstan Respýblıkasynyń Qarýly Kúshteri Arnaıy operatsııalar kúshteriniń qolbasshylyǵyn qurý týraly» Jarlyqqa qol qoıǵan edi.
Foto: ortcom.kz