Qańtarda Qazaqstan qaı elge eń kóp eksport jóneltti

ASTANA. QazAqparat – Qańtarda Qazaqstannyń Eýrazııalyq ekonomıkalyq odaqtan tys elderge jóneltetin eksporty azaıyp, alatyn ımporty artty. Saýda jáne ıntegratsııa mınıstrligi usynǵan qańtardaǵy «úshinshi» eldermen taýar aınalymy týraly málimette osyndaı málimet keltirilgen, dep habarlaıdy QazAqparat tilshisi.

«Qazaqstan men úshinshi elder (Eýrazııalyq ekonomıkalyq odaqtan tys elder – red.) arasyndaǵy taýar aınalymy 2023 jylǵy qańtarda 8,1 mlrd dollar boldy. Bul 2022 jylǵy uqsas kezeńmen salystyrǵanda 14,8% joǵary (7,1 mlrd dollar).

Atalǵan kezeńde Qazaqstannan úshinshi elderge jasalǵan eksport kólemi 5,5% tómendep, 5 mlrd 168,5 mln dollar boldy», - dep jazylǵa mınıstrlik málimetinde.

Qazaqstannyń eksportyn qabyldaýshy elderdiń alǵashqy bestiginde Italııa (1,3 mlrd dollar), Qytaı (796,3 mln dollar), Ońtústik Koreıa (559,3 mln dollar), Túrkııa (337,5 mln dolar), Rýmynııa (263,9 mln dollar) tur.

Alǵashqy ondyqtan bulardan bólek Ózbekstan (258,4 mln dollar), Aýǵanstan (209,3 mln dollar), Sıngapýr (187,4 mln dollar), Grekııa (169,6 mln dollar), Nıderland (141,3 mln dollar) bar. Aıta keterlik jaıt, Jyl basynda Nıderland jáne Grekııa elderine jóneltiletin eksport kólemi byltyrǵy qańtarǵa qaraǵanda 70%-dan astam tómendegen.

Al Qazaqstanǵa qańtar aıynda «úshinshi» elderden kelgen ımport kólemi 2 mlrd 957,7 mln dollar tóńireginde bolǵan. Byltyrǵy qańtarmen salystyrǵanda ósim – 83,5%. Import jóneltýshi elderdiń kóshin 9947, mln dollarmen Qytaı bastap tur. Aldyńǵy bestikti Germanııa (213,7 mln dollar), AQSh (177,7 mln dollar), Ońtústik Koreıa (142 mln dollar) jáne Túrkııa (159,3 mln dollar) túıindep tur.

Mınıstrlik málimetine qaraǵanda, bıyl Qazaqstan eksportaýshylary úshin jańa naryqtar paıda bolǵan. Atap aıtsaq, Bangladesh, Somalı, Sýdan, Gondýras, Sýrınam jáne Nıkaragýa elderi Qazaqstan eksporttaıtyn taýarlarǵa óz naryǵyn ashyp otyr.

Qazaqstan Eýrazııalyq ekonomıkalyq odaqtan tys elderge eksporttaǵan taýralardyń kósh basynda shıki munaı tur – 3,2 mlrd dollar nemese búkil eksporttyń 61,9%-y. Odan keıin mys jáne mystan jasalǵan katodtar ($227 mln), bıdaı ($187,1 mln), kender men mys kontsentrattary ($177,8 mln), ferroqorytpalar ($176,4 mln), temirjol lokomotıvteri ($133,8 mln), (2,6%), munaı ónimderi ($124,7 mln), kender men temir kontsentrattary ($62,3 mln), kúmis ($59,9 mln), tas kómir ($54,3 mln) tur.