Qańtarda ınflıatsııa 0,7 paıyz boldy

NUR-SULTAN. QazAqparat – 2020 jylǵy qańtarda Qazaqstanda ınflıatsııa 0,7 paıyzdy qurady. Bul jaıynda QR UEM Statıstıka komıtetinen málim etti, dep habarlaıdy QazAqparat.

Vedomstvo málimetinshe, baǵa azyq-túlik taýarlaryna ótken aıda – 0,9, azyq-túlik emes taýarlaryna, aqyly qyzmetterge 0,5 paıyz joǵarylady. Ótken aıda baǵanyń ósýi kókónisterge – 5,6, jumyrtqaǵa – 1,6, jarmalarǵa – 1,5, makaron ónimderine – 1, pasterlengen sútke, sary maıǵa – 0,9, unǵa, máıekti irimshikke – 0,8, muzdatylǵan balyqqa, shujyq ónimderine, súzbege – 0,7, et ónimderine, qyshqyl sút ónimderine – 0,6, sıyr etine, toqash jáne unnan daıyndalatyn ónimderine, shaıǵa – 0,5, jylqy etine 0,4 paıyz belgilendi. Temeki ónimderi 1,9 paıyzǵa qymbattady. Baǵanyń tómendeýi kúrishke – 0,9, qumshekerge, sókke 0,5 paıyz tirkeldi.

Baǵa ósimi avtomobılderge – 0,7, toqyma buıymdaryna, turmystyq aspaptarǵa, jıhaz jáne úıge qajetti zattarǵa, jeke qoldanylatyn taýarlarǵa – 0,4, jýǵysh jáne tazalaǵysh quraldarǵa, ydysqa 0,3 paıyzdy qurady. Benzın – 2,7, dızel otyny, tas kómir 0,3 paıyz qymbattady.

Baǵa deńgeıi quqyqtyq, jeke kólik quraldaryn saqtandyrý qyzmetterine – 5, mádenı is-sharalar salasyndaǵy qyzmetterge, kabeldik televızııa qyzmetterine – 0,6, densaýlyq qyzmetterine 0,5 paıyz ósti. Іshki qalalyq avtobýspen jol júrý aqysy 2,9 paıyzǵa qymbattady, al jolaýshylardyń áýe kóligimen tasymaldaý aqysy 1,3 paıyzǵa arzandady.

Turǵyn úı-kommýnaldyq qyzmetter salasynda tarıfter elektr energııasyna 1 paıyz ósti, al kárizge – 0,4, sýyq sýǵa 0,1 paıyz tómendedi.