Qańtarda Almaty áýejaıyn basyp alý isi: Aıyptalýshylarǵa sot úkimi shyqty

ALMATY. QazAqparat – Búgin Almatynyń qylmystyq ister jónindegi mamandandyrylǵan aýdanaralyq soty 2022 jylǵy qańtar oqıǵasy kezinde qalalyq áýejaıdy basyp alý isi boıynsha bes aıyptalýshyǵa úkim shyǵardy, dep habarlaıdy QazAqparat tilshisi.

Sot aıyptalýshylardy kináli dep tanyp, olarǵa úkim shyǵardy:

Áıgerim Tileýjanova – 4 jylǵa, Qalas Nurpeıisov - 8 jylǵa bas bostandyǵynan aıyryldy.

Nurlan Dálibaev, Ermuhamet Shilibaev pen Janaıdar Kármenov te 8 jyldan arqalady.

Tileýjanova men Nurpeıisov jappaı tártipsizdik uıymdastyrdy (QR QK 272-babynyń 1-bóligi) dep aıyptalsa, Dálibaev, Shilibaev jáne Kármenov áýejaıdyń strategııalyq obektileri men «KazAeroNavıgatsııa» RMK shabýyl jasaý jáne basyp alý kezinde zorlyq-zombylyq, órteý, múlikti qıratý jáne joıýmen qatar júrgen jappaı tártipsizdikke (QR QK 272-babynyń 2-bóligi) qatysty degen kúdikke ilindi.

Buǵan deıin prokýror qańtar oqıǵasy kezinde Almaty áýejaıyn basyp alý isi boıynsha aıyptalýshylardy 5 jyldan 11 jylǵa deıin bas bostandyǵynan aıyrýdy suraǵan bolatyn.

Úkim zańdy kúshine engen joq.

Esterińizge sala keteıik, belsendiler Áıgerim Tileýjan men Qalas Nurpeıisov, sondaı-aq Nurlan Dálibaev, Ermuhamet Shilibaev jáne Janaıdar Kármenovke áýejaıdy basyp aldy degen aıyp taǵylǵan.

Buǵan deıin Almaty áýejaıy jelilik polıtsııa bóliminiń burynǵy bastyǵy Talǵat Tálipov qańtar oqıǵasy kezinde bılik pen laýazymdyq ókilettigin asyra paıdalanǵany úshin kináli dep tanylǵan bolatyn.

Sýdıa sottalýshyny 5 jyl merzimge memlekettik qyzmette belgili bir laýazym atqarý quqyǵynan, sondaı-aq 6 jylǵa bas bostandyǵynan aıyrý jazasyn taǵaıyndady.

Budan bólek ol polıtsııa podpolkovnıgi ataǵynan aıyryldy.