Qańtarda 72 ball alǵan oqýshy mamyrda UBT-ǵa kamera alyp kirip, 130 upaı jınaǵan
Bul jaıynda Ulttyq testileý ortalyǵynyń dırektory Rýslan Emelbaev málim etti.
«Biz UBT-daǵy árbir joǵary nátıjeni tekseremiz. Osylaısha, ótken aptada testileý kezinde erejelerdi buzǵany úshin aýdıtorııadan barlyǵy 21 adam shyǵarylyp, olardyń nátıjesi joıyldy. Sonymen qatar joǵary nátıje kórsetken talapkerlerdi qaıta baqylaý barysynda erekshe nazarymyzǵa túsken testilenýshige toqtalsam. Test tapsyrýshy qańtar aıynda 72 ball, al negizgi UBT-da 130 ball jınaǵan. Nátıjesi birden 58 balǵa ósken, sondyqtan biz qosymsha kúsheıtilgen baqylaýdy ótkizýdi jón kórdik. Beınejazbalardy tekserý barysynda talapkerdiń UBT erejelerin buzǵany belgili boldy. Ol testileý barysynda beınekamera men mını qulaqqap qoldanǵan» deıdi Rýslan Emelbaev.
Onyń aıtýynsha, osyǵan jol bergen qyzmetshi testileýden shettetilgen.
Qyzmettik tekseris júrgizilip, tıisti shara qoldanylady. Al test tapsyrýshynyń nátıjesi joıyldy. Endi ol ekinshi múmkindigin qoldana almaıdy.
«Dostar, júıeni aldaýǵa tyrysýdyń qajeti joq. Jaýapkershilikten eshkim qutyla almaıdy. Taǵy da sizderdi akademııalyq adaldyqty saqtaýǵa shaqyramyn. Al biz baqylaýdy odan ári kúsheıtemiz» deıdi ortalyq dırektory.