Qańtar turaqtylyq pen amandyqtyń qanshalyq qundy ekenin kórsetti – Talǵat Qalıev

ASTANA. QazAqparat – Kez kelgen saıası júıede áleýmettik jarylys bolýy múmkin, alaıda problemany ol endi týyndap jatqan kezde sheshý kerek. Mundaı pikirdi Qoldanbaly etnosaıası zertteýler ortalyǵynyń dırektory Talǵat Qalıev bildirdi, dep habarlaıdy QazAqparat tilshisi.

«Qańtar memlekettiliktiń qanshalyqty osal, al turaqtylyq pen amandyqtyń qandaı qundy ekenin kórsetip berdi. Basty baılyǵymyzdy joǵaltyp alý óte ońaı eken. Memleketimizdi saqtaý, ony baǵalap, saqtaý óte mańyzdy. Memleket pen qoǵamnyń bir-birin estı bilýi de barynsha mańyzdy. Ákimder azamattardyń suranystaryna, olardyń qajettiligine jedel áreket etip, narazylyqtardyń artýyna, olardyń qarsylyqqa aınalýyna jol bermeýi tıis», - dedi Talǵat Qalıev.

Qoldanbaly etnosaıası zertteýler ortalyǵynyń dırektory Prezıdenttiń qoǵammen syndarly dıalogqa daıyn, azamattardyń suranysyna der ýaqytynda áreket etetin «Halyq únine qulaq asatyn memleket» tujyrymdama bastamasy ózekti ekenin basa aıtady.

«Jergilikti jerdegi sheneýnikter azamattarmen únemi baılanysta jumys isteý qajettigin, týyndaǵan áleýmettik suranysqa áreket etý kerektigin óte jaqsy túsinýi tıis. Muny da Qańtar barynsha jaqsy kórsetip bergen sııaqty», - dedi Talǵat Qalıev.

Onyń paıymynsha, mundaı joıqyn oqıǵa memleket pen qoǵam arasynda syna qaǵatyn kemshilikter jiberilgen kez kelgen elde bolýy múmkin.

«Mundaı oqıǵa kez kelgen elde, kez kelgen júıede bola alady. Tipti, Eýropa elderiniń ózinde únemi narazylyq týyndap, sonyń saldarynan jurt aınalany qıratyp, turaqsyzdyq stsenarıılerine ulasyp jatady. AQSh-taǵy Prezıdentti saılaýdan keıingi Kapıtolııdi basyp alýǵa túrtki bolǵan oqıǵany da aıtsaq bolady. Halyq bıliktiń dıalogqa daıyn ekenin sezinbegen kezde narazylyq oryn alady», - dedi Talǵat Qalıev.

Sarapshy qańtar qasiretiniń qaıtalanýyna jol bermeý úshin problemany týyndaǵan sátinde birden sheship, azamattardyń áleýmettik kóńil-kúıine monıtorıng jasaý, shynaıy áleýmettik suranys pen áleýmettik jelilerdegi shynaıy narazylyq kóńil-kúıdi ajyrata bilý qajet ekenin aıtady.

«Azamattardyń naqty problemalaryna nazar aýdaryp, máselelerdi sheshý, halyqtyń ál-aýqatyn arttyratyn jobalardy júzege asyrý, jańa jumys oryndaryn qurý, shaǵyn jáne orta bıznesti qoldaý, jaǵdaı jasaý kerek», - dedi Qoldanbaly etnosaıası zertteýler ortalyǵynyń dırektory.