Qańtar tragedııasynan qandaı sabaq aldyq – Aıdos Sarym
«Qańtar tragedııasy eldegi reformalardy boldyrmaýǵa baǵyttalǵan qadam bolatyn. Ózderiniń «dástúrli» maıshelpekterinen, eksklıýzıvti ekonomıkalyq monopolııalary men múmkindikterinen aırylǵysy kelmegen revanshıstik toptardyń aldyn ala daıyndalǵany, qarýlanǵany aıqyn kórindi. Buǵan qosa keıbir polıtsııa jáne kúshtik qurylym basshylarynyń satqyndyq jasap, áskerı boryshtaryn oryndamaǵanyn eske alýymyz kerek. Jergilikti jáne ortalyq bılik tarmaqtaryna ses kórsetý, ózara uıymdasyp, kıimderge belgi taǵyp, áskerı jáne arnaıy tehnıkany paıdalanyp, bir kezde birneshe aımaqta memlekettik organdar men ákimdikterdi kúshpen basyp alý, órteý, aeroport pen vokzaldar jumysyn buǵattaý, telearnalardy basyp alyp, olardan habar taratý áreketterine qarýly búlik jáne memlekettik tóńkeris áreketi degen baǵa berip, negizgi kórinisteri men tásilderin ańǵarýǵa bolady dep sanaımyz», - dedi Aıdos Sarym Májilistiń búgingi otyrysynda.
Onyń aıtýynsha, tótenshe jaǵdaı jarııalanǵanda kóshede júrý, komendanttyq saǵatty moıyndamaý, qarý, armatýra men tas taratý, jastarǵa arnaıy ishimdikter, energetıkter taratý, jandyrǵysh Molotov kokteılderin taratý, kolonna quryp, jolaı jurttyń múlkin tonaý, órteý, qaraqshylyq áreketterin uıymdastyrý sııaqty áreketter ekstremızm dep baǵalanýy kerek.
«Bir ǵana Almatyda aınaldyrǵan úsh kúnde myńǵa jýyq kásip nysany tonalyp, órtengenin, júzdegen avtokólikterdiń jol boıy órtengenin qalaı esten shyǵaramyz?
Júzdegen, myńdaǵan áskerı qarýdyń qoldy bolyp, olardyń osy kezge deıin jer jerden tabylyp, beıbit zamanda azamattardyń mert bolýyna, jaralanýyna áli kúnge deıin ákelip jatqanyna qandaı baǵa berýimiz kerek? Halyq bizden ne kútip otyr? Jurt eldegi reformalardyń jalǵasqanyn, toqtamaǵanyn qalaıdy. Shyn mánindegi Ádiletti Qazaqstannyń ornaǵanyn qalaıdy. Eń bastysy qazaq qaýymy osyndaı syn men synaqtardyń bolmaǵanyn, qaıtalanbaǵanyn qalaıdy», - deıdi depýtat.
Muny jazda ótken tarıhı referendým men kúzdegi prezıdenttik saılaýy aıqyn kórsetti.
«Qańtar tragedııasynan shynaıy sabaq alǵanymyz ras bolsa, Memleket basshysy bastaǵan reformalardyń aıasynda birigip, jiger tanytyp, eldik isin burynnan beter energııamen iske asyrýymyz shart. Aldaǵy jyldar Qazaqstan úshin kúrdeli bolady. Álemdegi jaǵdaı da, geosaıası túıtkilder men táýekelder sany eselep artyp keledi. Qazaqtyń bul zamanda jaıbaraqattanyp, erkeleıtin esh jóni joq. Endigi kezde bizge myqty, syrtqy qaýipke tótep berip, elin qorǵaýǵa qabiletti jańarǵan ulttyq armııa, jańa dáýirge laıyqty, el azamattaryna qorǵan ulttyq sot, ulttyq polıtsııa, ulttyq kúshtik qurylymdar kerek. Osyny qamtamasyz etsek qana Qańtar tragedııasynan sabaq alǵanymyz ras bolady», - dedi Aıdos Sarym.
Vıdeodan alynǵan kadr