Qańtar tragedııasy: Úsh aptada 747 qarý, 18 myńnan astam oq-dári tárkilengen

NUR-SULTAN. QazAqparat – QR Іshki ister mınıstrligi qańtar tragedııasynan keıingi izdestirý sharalarynyń qorytyndysy boıynsha 747 qarý, 18 myńnan astam oq-dári tárkilengenin málim etti, dep habarlaıdy QazAqparat tilshisi.

Bul týraly mınıstrliktiń baspasóz qyzmeti aqparat taratty.

«Úsh aptada Almaty qalasy, Almaty jáne Jambyl oblystarynda urlanǵan qarýdyń basym bóligi tárkilendi. Qazirgi ýaqytta jalpy sany 747 qarý men 18 myńnan astam oq-dári tárkilendi.

Máselen, 5 qańtarda Almatyda qarý-jaraq dúkenin tonaýǵa qatysqan, buryn urlyq jasaǵany úshin sottalǵan Jambyl oblysynyń 33 jastaǵy turǵyny 30 qańtarda ustaldy.

Atap aıtqanda, ol dúken esigindegi temir torlarǵa kabel baılap, «VAZ-2114» avtokóligimen tartyp julyp alǵan. Osydan keıin kúdikti eki tegis uńǵyly jáne eki oıyq uńǵyly myltyqty ıemdengen», - dep jazady mınıstrliktiń baspasóz qyzmeti.

Mınıstrliktiń resmı málimeti boıynsha, keıbir kúdiktilerden kúsh qurylymdaryna tıesili buıymdar men quraldar tárkilengen.

«Almatyda qalanyń 4 turǵyny ustaldy. Olardan qarý-jaraq dúkeninen urlanǵan 10 myltyq pen oq-dári tárkilendi. Sonymen qatar, olardan kúsh qurylymdarynyń qyzmetkerlerinen urlanǵan oq ótkizbeıtin keýdesheler, qalqandar men dýlyǵalar tárkilendi.

Kúdiktiler sottyń sanktsııasymen ýaqytsha ustaý ızolıatoryna qamaldy. Qazirgi ýaqytta qarýlar jasyrylǵan oryndardy tabýǵa baǵyttalǵan jedel is sharalar jalǵasýda», - dep jazylǵan mınıstrliktiń málimetinde.