Qańtar tragedııasy: Elvıra Ázimova tergeý kezinde kúıik jaraqatyn alǵandardyń isi týraly pikir bildirdi
«Almaty oblysy men qalasynda birneshe azamattyń, onyń ishinde kámeletke tolmaǵan balalardyń denesine kúıik jaraqaty túskeni týraly málimetter rezonans týǵyzdy. Onyń bári qazir eshqaıda ketpeý týraly qolhat nemese týystarynyń kepilgerligi arqyly qamaýdan bosatyldy. Bul faktiler boıynsha tergeý bastaldy. Ol jaıttardyń quqyqtyq baǵasy sot-medıtsınalyq saraptamalar men medıtsınalyq qorytyndylarǵa baılanysty bolady. Sondaı-aq, kýágerler men zardap shegýshilerdiń bergen jaýabyna da baılanysty», - dedi Elvıra Ázimova.
Onyń aıtýynsha, ustalǵandardyń densaýlyq jaǵdaıyna baılanysty qamaý sharalaryn balama sharalarmen aýystyrý týraly ótinishteridiń kóbi qanaǵattandyrylǵan.
«Emdelýdi qajet etetin basqa ustalǵandarǵa mekemeniń ishinde medıtsınalyq qyzmet kórsetilip jatyr. Azamattyq medıtsına ókilderinen quralǵan turaqty komıssııalar atalǵan mekemelerge udaıy baryp júr», -dedi Adam quqyqtary jónindegi ýákil.