Qańtar tragedııasy: Adam quqyqtary jónindegi ýákildiń atyna azaptaý men qatygezdik týraly 20 jazbasha shaǵym túsken

NUR-SULTAN. QazAqparat – Adam quqyqtary jónindegi ýákildiń atyna azaptaý men qatygezdik týraly 20 jazbasha shaǵym túsken. Bul týraly Elvıra Ázimova «Habar-24» telearnasynda ótken brıfıngide aıtty, dep habarlaıdy QazAqparat tilshisi.

«Qazirgi ýaqytta azamattardan ózimniń atyma qańtar aıyndaǵy bolǵan oqıǵalarǵa baılanysty zańbuzýshylyqtar týraly biraz ótinish kelip túsip jatyr. Sonymen birge biz 13-19 qańtar arasynda óńirlerde 81 tergeý ızolıatoryna jáne ýaqytsha ustaý ızolıatoryna baryp, táýelsiz monıtorıng jasadyq», - degen ýákil sol monıtorıngtiń alǵashqy qorytyndylaryna toqtaldy.

«Azamattardyń quqyǵy buzylǵany týraly 39 ótinish tústi. Onyń 20-sy — azaptaý men qatygezdikke qatysty jazbasha túrde túsken ótinishter. Qalǵandary negizsiz qamaýǵa alý, ákimshilik jazalaý týraly sot sheshimderimen kelispeý, medıtsınalyq kómek kórsetpeý, advokattardy jibermeý máselelerine qatysty.

Degenmen, áleýmettik jelide zańbuzýshylyqtar týraly qońyraýlar men habarlamalar aıtarlyqtaı kóp boldy», - dedi Elvıra Ázimova.