Qańtar tragedııasy: Adam quqyqtary jónindegi ýákil Bas prokýratýrany anonımdi shaǵymdarǵa qulaq asýǵa shaqyrdy

NUR-SULTAN. QazAqparat –Adam quqyqtary jónindegi ýákil Elvıra Ázimova Bas prokýratýrany qańtar tragedııasyna baılanysty tergeýler boıynsha túsken anonımdi shaǵymdarǵa qulaq asýǵa shaqyrdy, dep habarlaıdy QazAqparat tilshisi.

«Habar-24» telearnasynda ótken brıfıngide Adam quqyqtary jónindegi ýákil eldegi Tótenshe jaǵdaı rejımi kezinde qamaýǵa alynǵandardyń quqyqtary buzylǵanyn rastaıtyn derekter bar ekenin aıtty.

«Azamattardyń quqyǵy buzylǵany týraly 39 ótinish tústi. Onyń 20-sy — azaptaý men qatygezdikke qatysty jazbasha túrde túsken ótinishter. Qalǵandary negizsiz qamaýǵa alý, ákimshilik jazalaý týraly sot sheshimderimen kelispeý, medıtsınalyq kómek kórsetpeý, advokattardy jibermeý máselelerine qatysty», - dedi Elvıra Ázimova.

Elvıra Ázimova Atyraýdaǵy rezonansty jaǵdaı boıynsha pikir bildire kelip, Bas prokýratýraǵa usynys tastady.

«Aıtylǵan barlyq mán-jaılardy jáne azamattardyń qylmystyq qýdalaýdan qorqatynyn eskere otyryp, Bas prokýratýraǵa naqty shaǵymdardyń túsýin kútpeı, barlyq anonımdik túrde kelgen habarlamalardy, sondaı-aq, áleýmettik jelidegi habarlamalardy tekserýdi bastaý kerek», -dedi Adam quqyqtary jónindegi ýákil.