Qańtar oqıǵasynda sodyrlardyń áreketin ratsııamen úılestirýshiler kim ekeni áli anyqtalǵan joq – Bas prokýror

ASTANA. QazAqparat – Májilis depýtaty Erlan Saırov Bas Prokýrordan qańtar oqıǵasy kezinde sodyrlardyń áreketin arnaıy ratsııa arqyly úılestirgen, áskerı kıimmen júrgen toptyń kim ekenin surady, dep habarlaıdy QazAqparat tilshisi.

«Qańtar oqıǵasy kezinde Almaty qalasynda áskerı kıingen, tolyq qarýlanǵan, baılanys quraldarymen óte joǵary dárejede qamtylǵan top paıda boldy. Olar qalanyń ishinde sodyrlardyń búkil júris-turysyn basqardy. Biraq qalada jaǵdaı rettelgennen keıin ol sodyrlar lezde joǵalyp ketti. Osy bir jyldyń ishinde sol sodyrlardyń bireýi tabyldy ma? Olarǵa áskerı kıim men qarýdy, ratsııany kim berdi? Osy máseleniń mán-jaıy zertteldi me?», - dep surady depýtat.

Bas prokýrordyń aıtýynsha, ondaı áskerı kıim kıgen toptyń bolǵany ras. Biraq olardyń kim ekeni áli anyqtalmaǵan.

«Bul faktiler boıynsha vedomstvoaralyq jedel tergeý toby arnaıy qurylǵan, tergeý júrip jatyr. Sol kúnderi áskerı kıingen adamdar Raıymbek batyr kóshesin tolyq basyp alyp, bógetter ornatyp, kósheni jaýyp tastaǵany bárimizge belgili.

Ózińiz aıtqan balalar ınfektsııalyq emhanasy fılıalynyń mańaıynda, onyń túbinde turǵan avtokólik turaǵynyń janynda, janar-jaǵarmaı stansasynyń janynda turǵan kóptegen qylmysker bolǵan», - dedi Berik Asylov.

Aıtýynsha, atalǵan tulǵalar áli kúnge deıin qolǵa túspegen.

«Sol kúnderi ustaýǵa múmkindik bolmady ma, ol kisilerdiń bári ol kezde ustalǵan joq. Ózińiz aıtqandaı, olardyń bári boı jasyryp, qashyp ketti. Bul adamdardyń kim ekenin tergeý kezinde biz áli anyqtaǵan joqpyz. Ol kisilerdiń qaı jaqqa ketkenin, árıne anyqtaımyz. Bizge negizi ýaqyt kerek. Qazirgi tańda kóptegen jedel tergeý jumystary jalǵasýda», - dedi Bas prokýror.