Qańtar oqıǵasynda halyqtyń aldynda boldym, bári birlesip sheshildi – ShQO ákimi

NUR-SULTAN. QazAqparat – Shyǵys Qazaqstan oblysynyń ákimi Danıal Ahmetov Qańtar oqıǵasy kezinde alańda, halyqtyń arasynda bolǵanyn aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi esep berýde tilshiler ShQO ákiminen Qańtar oqıǵasy kezinde halyq aldyna nege shyqpaǵanyn surady.

«5 qańtar kúni men alańda boldym. Kúni-túni sonda boldyq. Shyǵys Qazaqstanda, Óskemen qalasynda birde-bir ǵımarat berilgen joq. Ózimizdiń ákimshilikti eshkimge bermegen jalǵyz oblys boldyq. Men halyqtyń aldynda turdym. Ol teledıdarda kóptegen arnadan kórsetildi. Ony siz kórmeseńiz, keshirersiz, áriptesterińizden surap alarsyz. Men alańda boldym. Halyqtyń ishinde boldym. Barsha máseleni birge sheshtik», - dep jaýap berdi Danıal Ahmetov.

Eske sala ketsek, jyl basynda suıytylǵan gaz baǵasynyń qymbattaýy túrli óńirlerdegi narazylyqtarǵa ulasqan edi.