Qańtar oqıǵasynda dúkender men bankomat tonaǵandar ustaldy – QR ІІM

NUR-SULTAN. QazAqparat – Іshki ister organdary jyl basyndaǵy jappaı tártipsizdikter barysynda urlyq pen tonaý jasaǵandardy anyqtap jatyr. Bul týraly QR Іshki ister mınıstrligi Tergeý departamentiniń bastyǵy Sanjar Ádilov aıtty, dep habarlaıdy QazAqparat.

«Tek ótken apta ishinde múlikti jáne qarýdy urlaý faktileri boıynsha 7 kúdikti ustalyp, sot sanktsııasymen qamaýǵa alyndy. Mysaly, Almaty qalasynda bolǵan jappaı tártipsizdikter kezinde 5 adamnan qurylǵan top polıtsııa qyzmetkerleriniń arnaıy quraldaryn jáne qalanyń 4 dúkeninen ártúrli taýarlardy jymqyrǵan», - dedi S. Ádilov Ortalyq kommýnıkatsııalar qyzmetinde ótken brıfıngide.

Jedel is-sharalar júrgizý barysynda polıtsııa qyzmetkerleri kúdiktilerdiń bireýi turatyn mekenjaıdan polıtseılerdiń qalqandaryn, 2 elektr samokat, 2 teledıdar, 3 noýtbýk, kompıýter tehnıkasy men jańa brendti kıim-keshekter tapqan. Odan basqa kúdiktilerden satýǵa daıyndalǵan «pırollıdın» esirtki zaty salynǵan 76 oram tabyldy. Osy epızodtyń barlyq qatysýshylary anyqtaldy jáne sot sanktsııasymen kúzetpen ustaýǵa alyndy.

«Taǵy bir mysal – 6 qańtarda Almaty qalasynda Túrkistan oblysynyń 2 týmasy bankomatty buzyp alyp, 1 mln teńgeden artyq aqshalaı qarajat urlaǵan. Beınejazbalar men tergeý áreketteri kúdiktilerdiń kinásin dáleldeıdi.

Bıylǵy 8 qańtarda Túrkistan oblysynda buryn urlyq jáne tonaý úshin sottalǵan 2 jergilikti turǵyn ustaldy, olar bıylǵy 5 qańtarda Almaty qalasynda jappaı tártipsizdikter barysynda «Tehnodom» saýda úıinen 5 «Canon» fotoapparatyn, «Acer» noýtbýgin, 3 «Iphone 12» jáne «Samsýng» uıaly telefonyn, er adamdarǵa arnalǵan zattardy jáne Almaty qalasynda Tóle bı kóshesindegi «Zergerlik buıym» dúkeninen 11 zergerlik áshekeı ataýyn ashyq túrde urlaǵan. Kúdiktiler ýaqytsha ustaý ornyna qamaldy», - dedi QR ІІM ókili.