Qańtar oqıǵasynan keıin qalany jarylǵysh zattar men oq-dáriden tazartqan kınologtarǵa almatylyqtardyń alǵysy mol

ALMATY. QazAqparat - Almatyda qańtar oqıǵasynan keıin qyzmettik ıtterdiń kómegimen qarý-jaraq pen oq-dári tabylyp jatqanyn jazǵanbyz. Halyq kóp júretin jerde, ásirese, qalanyń ortalyq bóliginde jasyrylǵan qaýipti zattardy tabýda kınologtar men ıisshil ıtterdiń eńbegi zor. Urlanǵan qarý-jaraq balalardyń nemese nıeti buzyq, aram pıǵyldy bireýlerdiń qolyna tıse, ne bolaryn oılaýdyń ózi qorqynyshty. Alǵys aıtý kúnine oraı QazAqparat tilshisi Almatydaǵy QR Іshki ister mınıstrliginiń kınologııa ortalyǵyna baryp, ortalyqtyń bastyǵy Ánel Bolǵymbaevamen tildesken edi.

Bıyl QR Іshki ister mınıstrligine qarasty kınologııa ortalyǵynyń qurylǵanyna 20 jyl toldy.

Mekeme QR Úkimetiniń qaýlysymen 2002 jylǵy 27 naýryzda qurylǵan. Kınologııa ortalyǵynyń bastyǵy, polıtsııa podpolkovnıgi Ánel Bolǵymbaevanyń aıtýynsha, ortalyqta ıisshil ıtter esirtki, jarylǵysh zat, oq-dári izdeýge daǵdylanady.

Jedel tergeý toby quramyndaǵy iz kesý jumystary, tergeý eksperımentterindegi odorologııalyq irikteý, shabýyldap basyp alý qyzmetine arnaıy kýrstar boıynsha daıyndalady.

Sondaı-aq, munda Qazaqstannyń barlyq óńirlerinen, oblystardyń polıtsııa departamentterinen, QR ІІM Qylmystyq-atqarý júıesi komıteti, Ulttyq gvardııa, QR Memlekettik kúzet qyzmeti, QR UQK Shekara qyzmetiniń qyzmetkerleri de sheberlikterin shyńdaıdy.

«Almatydaǵy qańtar oqıǵasynan keıin bizdiń ıtter basyp alynǵan ǵımarattarda jarylǵysh zattar men oq-dári izdeýmen aınalysty. Qudaıǵa shúkir, eshqandaı oqys oqıǵa bolǵan joq. Sonymen qatar, ıisshil ıtter esirtki izdestirý sııaqty basqa da mańyzdy is-sharalarǵa qatysty», - deıdi Ánel Bolǵymbaeva.

Kınologııa ortalyǵynyń bastyǵy atap ótkendeı, qazirgi tańda elimizde 500-den asa kınolog bar.

Іz kesýshi ıtter óńirlerde mal urlyǵynyń jaı-japsaryn anyqtaýda jaqsy nátıje kórsetip júr.

«Biz qylmystyń aldyn alýǵa kóp kóńil bólemiz. Máselen, Almaty qalalyq polıtsııa departamentiniń kınologııalyq qyzmet bólimshesi bar. Polıtsııa kınologtary saǵat 20:00-den keıin ózderine bekitilgen ıtpen kóshe aralaıdy. Saıabaq aýmaqtaryn, Baýman toǵaıy, 28 panfılovshy baǵyn patrýldeıdi. Turǵyndar bul qyzmetke túsinistikpen qaraıdy, sebebi polıtsııa kınologtary júretin jerlerde qylmys sany az bolady», - deıdi spıker.

Ortalyqtaǵy ıtterdiń de qyzmetke jaramdylyq merzimi bolady. Ortasha alǵanda - 8-10 jyl.

Osy ýaqyt ótken soń, arnaıy komıssııa ıtti tekserýden ótkizip, qyzmetti jalǵastyra alatynyn nemese demalysqa shyǵýy kerektigin anyqtaıdy.

«Iisshil ıtter zeınet jasyna jetken soń, biz olardy qurmetpen shyǵaryp salamyz. Ádette, uzaq jyldar birge jumys istegen kınolog ózine alady. Bizde qyzmettik ıtterdi evtanazııa arqyly uıyqtatyp, óltirýge jol berilmeıdi. Sondaı-aq, ıtterdi qorektendirý, olarǵa veterınarlyq qyzmet kórsetý, dári-dármektermen qamtý tolyǵymen memleket tarapynan qamtamasyz etiledi. Kınologııada klassıkalyq nemis ovcharkasy men belgııalyq malınýa tuqymy qyzmet etedi», - dedi ortalyq bastyǵy.

Sonymen birge, Ánel Bolǵymbaeva kınolog bolǵysy keletinderdiń jumysqa turýǵa múmkindigi bar ekenin jetkizdi.

«Áskerı boryshyn ótegen, osy salada eńbek etkisi keletin jigitterdi respýblıka boıynsha kınologııalyq qyzmetke shaqyramyz. Ol úshin jergilikti polıtsııa qyzmetine habarlasýǵa bolady. Orta bilimi barlar serjanttar quramyna, orta arnaıy zańgerlik nemese veterınarlyq bilimmen ınspektorlyq quramǵa qabyldanady. Al aǵa ınspektordan ary qaraı joǵary zańgerlik jáne veterınarlyq bilim qajet. Serjanttar quramynyń ortasha eńbekaqysy - 150-200 myń teńge shamasynda», - dep atap ótti Ánel Bolǵymbaeva.