Qańtar oqıǵasynan keıin ızolıatorda kúdiktini uryp óltirgen 7 polıtseı sottaldy

ALMATY. QazAqparat – Qańtar oqıǵasynan keıin Almatyda ızolıatorda kúdiktini uryp óltirgen polıtsııa qyzmetkerlerine qatysty sot úkimi shyǵaryldy, dep habarlaıdy QazAqparat tilshisi.

Almaly aýdandyq soty Almaty qalasy polıtsııa departamenti ýaqytsha ustaý ızolıatorynyń jeti qyzmetkerine qatysty ólimge ákep soqqan, basqa tulǵalarǵa zııan keltirý maqsatynda bıligin asyra paıdalanyp, zorlyq-zombylyq qoldandy, qyzmette áreketsizdik tanytty degen aıyp boıynsha qylmystyq isti qarady.

Sotta 2022 jyldyń 9 qańtarynda jappaı tártipsizdikterge qatysty degen kúdik boıynsha jábirlenýshi A. ýaqytsha ustaý ızolıatoryna jetkizilgeni anyqtaldy. Ol ýaqytsha ustaý ızolıatory kamerasynda azaptaýdan kóz jumdy.

Sýdıa kúdiktini óltirdi dep aıyptalǵan 7 polıtsııa qyzmetkerin QR QK 146-baby boıynsha kináli dep tanydy.

«Alty adamǵa 8 jyldan 10 jylǵa deıingi merzimge bas bostandyǵynan aıyrý jazasy taǵaıyndaldy. Qyzmette áreketsizdik tanytqan bir qyzmetker 5 jylǵa sottaldy. Sottalýshylardyń barlyǵy polıtsııa sheninen aıyryldy», - dep habarlady Almaty qalalyq sotynyń baspasóz qyzmetinen.

Sondaı-aq, sýdıa sottalýshylarǵa marqumnyń týystaryna 20 mıllıon teńge moraldyq shyǵyn tóleýge mindettedi.

Úkim zańdy kúshine engen joq.