Qańtar oqıǵasynan keıin eń kóp qarý Jambyl oblysynda tárkilengen
«Jalpy, el boıynsha quqyq qorǵaý organdary qańtar oqıǵalary kezinde urlanǵan 750-den astam myltyq jáne tegis uńǵyly qarýdy tapty. Eń kóp sany Jambyl oblysynda - 281 qarý, Almaty qalasynda – 249, al Almaty oblysynda 201 qarý tárkilendi», - dedi E. Qılymjanov Ortalyq kommýnıkatsııalar qyzmetinde.
Onyń aıtýynsha, Almaty qalasynda jedel izdestirý is-sharalaryn júrgizý kezinde destrýktıvti dinı aǵymynyń jaqtaýshysy «S» esimdi azamat ustaldy. Odan «Orýjeınık» ańshylyq dúkeninen urlanǵan 12-shi kalıbrli vınchester men «Qorǵan» dúkeninen urlanǵan 2 myltyq tabyldy.
«Tarazda «D» esimdi azamat ustaldy, odan Jambyl oblysy Polıtsııa departamentinen urlanǵan 4 «Makarov» tapanshasy men onyń 131 oǵy tárkilendi. Almaty oblysynda «Qazaqstandyqtar» uıymdasqan qylmystyq tobynyń atys qarýynyń saqtaý oryndary tabyldy. Olar óz qarýlaryn Báıterek kentiniń shetindegi qaraýsyz qalǵan ǵımaratta saqtaǵan. Atalǵan jerde 28 qarý-jaraq, onyń ishinde 2 «Kalashnıkov» avtomaty, 3 «Makarov» tapanshasy, sheteldik óndiristiń 4 tapanshasy, 5 qos uńǵyly jáne 10 bir uńǵyly myltyq, 2 sholaq myltyq, túrli kalıbrli oqtar, jaryqty-dybysty granatalar men bronıjıletter tabyldy», - dedi Bas prokýratýra ókili.
Sonymen qatar ol zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan azamattar qylmystyq jaýaptylyqtan bosatylatynyn eske saldy. Alaıda olardyń áreketterinde ózge qylmys quramy bolmaýy kerek. Bul rette adamdy quqyq qorǵaý organdary qarýmen ustap alǵan jaǵdaılar erikti túrde tapsyrý dep tanylmaıdy.
Budan buryn habarlanǵandaı, qańtar oqıǵasyna qatysty sot sanktsııalarymen 627 kúdikti adam qamaýda otyr.
Sondaı-aq Taldyqorǵanda memlekettik nysandardy basyp alý qatysýshylaryn qarjylandyrǵandar anyqtaldy.