Qańtar oqıǵasynan keıin densaýlyǵym syr berdi - kásipker

ALMATY. QazAqparat – Qańtardaǵy jappaı tártipsizdik kezinde memlekettik jáne jeke nysandardyń qıraǵany belgili. Saldarynan kásipkerlerge jáne jeke tulǵalarǵa mıllıardtaǵan shyǵyn keldi. Onyń deni Almatyda. Zalal kelip, shyǵynǵa batqan kásipkerlkerdiń biri - Aıgúl Myrza, dep habarlaıdy QazAqparat tilshisi.

El tarıhynda qara tańba bolyp qalǵan qańtar oqıǵasyna bir jylǵa jýyq ýaqyt boldy.

Qoǵamdy tártipsizdik jaılaǵan sol kúnderi respýblıka boıynsha myńdaǵan kásipker zardap shekti. Búlik kezinde Almatyda júzdegen nysan qırady.

Búgingi kúni kásipkerlerdiń basym bóligi qaıta aıaqqa turyp, kásibin jalǵastyryp jatyr.

Qańtardyń 5-inen 6-syna qaraǵan túni Aıgúl Myrzanyń aqsha aıyrbastaý pýnktine bir top adam basyp kirgen.

«Abyroı bolǵanda, qyzmetkerler shyǵyp úlgerdi. Buzaqylar bárin qıratyp, aqshany qoldy etti. Bıznes salasynda júrgender táýekelge barady. Kásibin damytý úshin qolyndaǵysyn salady. Biz de sóıttik. Orta jasqa kelgende dalada qaldyq dep oıladym. Qazir oılasam júregim syzdap, qan qysymym kóterilip, dirildep ketem. Sol oqıǵadan keıin densaýlyǵym syr berdi»,- deıdi kásipker.

Aıtýynsha, memleket olardy qaraýsyz qaldyrmaǵan. Ótemaqy alyp, az ýaqyttyń ishinde kásibin qaıta jandandyrdy.

«Tártipsizdik saldarynan meniń bıznesime 52 mln teńgeden astam zalal keldi. Búkil qajetti qujattardy rásimdegennen keıin tórt aıdyń ishinde esepshotyma tıisti qarajat tolyq kólemde aýdaryldy. Osyndaı qıyn kezde Úkimet úmit syılady. Bizge kómekke keldi. Kásibimizdi ary qaraı jalǵastyrýǵa múmkindik berdi. Aıtar alǵysym sheksiz»,- deıdi almatylyq kásipker.

Aıta keteıik, Almatyda qańtar oqıǵasy kezinde 1 600-ge jýyq bıznes sýbektisi zardap shekti. Onyń 96 paıyzy - shaǵyn jáne orta bıznes ókilderine tıesili.