Qańtar oqıǵasyna qatysýshylarǵa raqymshylyq: Áshimbaev qabyldanǵan Zańǵa pikir bildirdi

ASTANA. QazAqparat – Senat tóraǵasy Máýlen Áshimbaev Parlament qabyldaǵan «Raqymshylyq jasaý týraly» Zańǵa qatysty pikir bildirdi, dep habarlaıdy QazAqparat tilshisi.

«Qabyldanǵan zań Memleket basshysynyń 2022 jylǵy 1 qyrkúıektegi Joldaýynda bergen tapsyrmasyn oryndaý maqsatynda ázirlendi. Zań «Qasiretti qańtar» oqıǵasy kezinde tártipsizdiktermen baılanysty qylmystyq quqyq buzýshylyqtarǵa barǵan azamattardy qylmystyq jaýaptylyqtan bosatýdy jáne olardyń jaza merzimderin qysqartýdy kózdeıdi. Sonymen qatar zańda raqymshylyq jasaýdy qoldaný sharttary, tártibi jáne ol qańdaı adamdarǵa qoldanylmaıtyny týraly naqty normalar belgilengen. Bul zańdy tártip buzýǵa jol bergen adamdarǵa qatysty qoǵam men memleket tarapynan jasalǵan gýmanızm qadamy dep qabyldaımyz. Budan bylaı osyndaı qaıǵyly oqıǵalar elimizde eshqashan qaıtalanbaıdy dep senemiz», – dedi M. Áshimbaev.

Qujat qazaqstandyqtardy qylmystyq teris qylyqtary men aýyrlyǵy az jáne ortasha qylmystary úshin jazadan bosatýdy kózdeıtin normalardy qamtıdy. Mundaı qylmystar úshin jazasyn ótegenderden sottylyǵy alynady.

Al aýyr jáne asa aýyr qylmys jasaǵandarǵa: aýyr qylmystar úshin sot taǵaıyndaǵan merzim tórtten úshke, al asa aýyr qylmystar úshin jartysyna qysqarady.

Budan basqa, zańda bosatylatyn adamdardy jumysqa ornalastyrý, medıtsınalyq kómek kórsetý jáne qujattardy resimdeý sharalary qarastyrylǵan.

Bul rette azaptaýlar jasaǵan adamdar, terrorıster, ekstremıster, retsıdıvıster jáne tártipsizdikterdi uıymdastyrýshylar raqymshylyqqa jatpaıtynyn atap ótken jón.

Búgin Senattyń jalpy otyrysynda «Raqymshylyq jasaý týraly» Zań qabyldandy.

Qańtar oqıǵasyna qatysty 20-ǵa jýyq adam jappaı tártipsizdikti uıymdastyrýshy retinde kúdikke ilindi.

Sonymen qatar qańtar oqıǵasy kezinde zań buzǵan quqyq qorǵaý organdary qyzmetkerleriniń tek bireýine raqymshylyq jasalatyny málim boldy.

Foto: senate.parlam.kz