Qańtar oqıǵasyna qatysty feıkter boıynsha 11 qylmystyq is qozǵaldy

NUR-SULTAN. QazAqparat – Qańtar oqıǵasyna qatysty jalǵan aqparat taratý faktileri boıynsha 11 qylmystyq is qozǵaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Áleýmettik jelilerde feıkter, sonyń ishinde kúdiktilerge tergeýdiń ruqsat etilmegen ádisterin qoldanýy týraly aqparat taratylýda. Árbir fakt jan-jaqty tekserilýde. Qylmystyq kodekste jalǵan aqparat taratqany úshin jaýapkershilik kózdelgenin eske salamyn. Qazirgi ýaqytta osyndaı habarlamalar boıynsha 11 sotqa deıingi tergep-tekserý tirkeldi. Bir qylmystyq is sotqa joldandy», - dedi E. Qılymjanov Ortalyq kommýnıkatsııalar qyzmetinde.

Onyń aıtýynsha, óz tarapynan prokýratýra jáne quqyq qorǵaý organdary qylmystardyń tolyq tergelýin, zań normalarynyń saqtalýyn qamtamasyz etý úshin barlyq kúsh pen resýrstardy paıdalanýda.

Budan buryn habarlanǵandaı, qańtar oqıǵasyna qatysty sot sanktsııalarymen 627 kúdikti adam qamaýda otyr.

Sonymen qatar Taldyqorǵanda memlekettik nysandardy basyp alý qatysýshylaryn qarjylandyrǵandar anyqtaldy.