Qańtar oqıǵasyna qatysty árbir sheshim prokýratýramen kelisiledi – Oljas Bektenov
«Kóptegen aryzdanýshylar maska taqqan jáne kaska kıgen polıtsııa qyzmetkerlerin atap kórsetedi, ıaǵnı olardyń tipti júzderin de kórmegen, attaryn da bilmeıdi. Qazir tergeý aryzdanýshylar men kýágerler bergen irili-usaqty aıǵaqtar jáne beınebaqylaý kameralarynan saqtalǵan jazbalar arqyly qańtar oqıǵasyn egjeı-tegjeıli zerdeleýde. Bul jumys kóptegen beınebaqylaý kameralarynyń jumys istemeýimen ne tártipsizdikter kezinde keıbireýleriniń buzylyp qalýymen qıyndyq týdyryp otyr. Ótinish berýshilerdiń kóbine tártipsizdikterge belsendi qatysýshy degen kúdik taǵylýda. Jaraqattar kóshedegi tártipsizdikter kezinde alynýy múmkin degen nusqa joqqa shyǵarylmaıdy. Sondyqtan tergeý áreketteri aryzdanýshylardyń dene jaraqattaryn alý kezeńin anyqtaýǵa baǵyttalǵan. Barlyq qylmystyq ister boıynsha qajetti sot saraptamalary taǵaıyndaldy», - dedi O. Bektenov.
Onyń aıtýynsha, qazirgi ýaqytta 46 aryzdanýshydan jeńil dene jaraqaty, altaýynan ortasha dene jaraqaty anyqtalǵany belgili boldy. Bul rette, 25 adamnan dene jaraqaty anyqtalmaǵan.
«Eger tergeý barysynda olarǵa fızıkalyq jáne psıhıkalyq yqpaldar korsetilgeni zańdy áreketter nátıjesinde anyqtalsa, sotqa deıingi tergep-tekserý QK-niń 146-babyna sáıkes toqtatylatyn bolady. Bizdiń ister boıynsha qazirgi ýaqytta polıtsııa qyzmetkerleri kúdikti retinde tanylmaǵan. Árbir protsestik sheshim zańmen talap etiletin bolǵandyqtan, prokýratýramen kelisiledi. Tergeý jalǵasýda jáne baqylaýda», - dedi agenttik basshysy.
Budan buryn habarlanǵandaı, Oljas Bektenov qańtar aıyndaǵy oqıǵalardan keıin, quqyq qorǵaý organdaryna kúshtik qurylymdardyń qyzmetkerleriniń áreketterine qatysty aryzdar kelip túse bastaǵanyn aıtty.
Osy oraıda kúsh qurylymdardyń qyzmetkerlerine qatysty 234 qylmystyq is tergelip jatqany aıtyldy.
Quqyq qorǵaý qyzmetkerlerine qatysty qylmystyq quramnyń bolmaýyna baılanysty 7 is toqtatyldy.