Qańtar oqıǵasyna qatysty 717 adam sottaldy
«Qańtardaǵy oqıǵalar boıynsha sotqa barlyǵy 474 qylmystyq is joldandy, olar boıynsha 717 adam sottaldy. Memleket basshysynyń aýyrlatatyn mán-jaılar bolmaǵan kezde jazany jeńildetý jónindegi tapsyrmasyn oryndaý maqsatynda prokýrorlar sottardy bas bostandyǵynan aıyrýǵa baılanysty emes jazalardy taǵaıyndaýǵa baǵyttaýda», - dedi ol Ortalyq kommýnıkatsııalar qyzmetindegi brıfıng barysynda.
Taraz qalasy sotynyń úkimimen Jambyl oblystyq polıtsııa departamentinen urlanǵan «Makarov», «Stechkın» júıesiniń jaýyngerlik tapanshalaryn jáne oq-dárilerdi saqtaǵany jáne tasymaldaǵany úshin jergilikti turǵyn sottaldy. Atalǵan azamat óz kinásin moıyndap, jasaǵan isine ókinip, sotqa deıingi tergeý kezinde tergeý organdaryna kómek kórsetti.
«Osy jaǵdaılardy eskere otyryp, oǵan eki jyl shekteý túrindegi jaza taǵaıyndaldy. Qarýdy urlaýmen jáne saqtaýmen baılanysty aýyr qylmys jasaǵan, zalaldy ótemegen jáne ótelmegen sottylyǵy bar 92 sottalýshy bas bostandyǵynan aıyrýdyń naqty merzimin aldy. Qalǵan qylmystyq ister boıynsha tergeý organy daýsyz dálelderdi jınaý jáne barlyq qatysy bar adamdardy qylmystyq jaýaptylyqqa tartý boıynsha jan-jaqty jumys júrgizip jatyr. Jumystyń negizgi kólemi jappaı tártipsizdikter men terrorızm aktileri boıynsha júrgizilý ústinde. Myńnan astam adam ister boıynsha kúdikti retinde tanyldy. Árqaısysymen jaýap alý, betttestirý, aıǵaqtardy ornynda tekserý jáne naqtylaý sııaqty jáne basqada keshendi tergeý áreketteri júrgizilýde», - dedi Bas prokýratýra ókili.
Nurlybek Sábıtovtiń dereginshe, tek arnaıy prokýrorlardyń isteri boıynsha 40 myńnan astam tergeý áreketteri júrgizildi. Saraptamalyq uıymdardyń óndirisinde 4 myńnan astam zertteýler bar.
«Mindetti tergeý áreketteri qylmystarǵa ár qatysýshysynyń rólin anyqtaý, onyń áreketterin obektıvti baǵalaý jáne zańdy protsestik sheshim qabyldaý úshin jasalady. Qylmystyq qýdalaý organdary tolyq, obektıvti jáne jan-jaqty tergeý júrgizý úshin barlyq kúshter men quraldardy jumyldyrýda», - dedi ol.