Qańtar oqıǵasyna qatysqandardyń bári bireýlerdiń aıdap salýymen shyqpaǵan – Abzal Quspan

ASTANA. QazAqparat - Qańtar oqıǵasyna baılanysty mıtıngige qatysqandardyń bári bireýlerdiń aıdap salýymen shyqpaǵan. Bul týraly Májilistiń jalpy otyrysynda «Amanat» qoǵamdyq komıssııasynyń tóraǵasy Abzal Quspan aıtty, dep habarlaıdy QazAqparat tilshisi.

«Qańtar oqıǵasyna baılanysty mıtıngke qatysqandardyń bári bireýlerdiń aıdap salýymen shyqpaǵan. Jekelegen jaǵdaıda ol jergilikti jerdegi basshylardyń máseleni sheshýde qulyqsyzdyq tanytýynan oryn alǵanyn atap kórsetkim keledi. Mysaly, Qyzylorda qalasynda bolǵan jappaı tártipsizdik kezinde qaza tapqan Farhat Omarovtyń anasy qaza tapqan balasyna qatysty qylmystyq is qujattarymen tanystyrylmaǵan. Jergilikti atqarýshy organnan eshqandaı materıaldyq kómek almaǵan. Osy suraqtarmen qabyldaýǵa jazylsa da ne oblys prokýrory, ne oblys ákimi tarapynan qabyldanbaǵan», - dedi ol.

Advokattyń atap ótýinshe, osyndaı máselemen komıssııaǵa Qyzylorda oblysynan birneshe ata-ana habarlasqan.

«Ókinishtisi sol, komıssııa bolyp aralassaq ta jaǵdaıdy ózgerte almadyq. Nátıjesinde Farhattyń anasy Bıbigúl Álisheva birneshe márte Astanaǵa ushaqpen kelip, mıtıngke shyǵýǵa májbúr boldy», - dedi Abzal Quspan.

Foto:Zakon.kz