Qańtar oqıǵasyna bir de bir qyrǵyz azamaty qatyspaǵan – Qyrǵyzstan Berik Asylovtyń málimdemesine jaýap berdi
«Qazaqstan Respýblıkasynyń Bas prokýrory Berik Asylov búgin parlamenttik tyńdaýda 2022 jylǵy qańtardaǵy tártipsizdikke Qyrǵyz Respýblıkasy azamattarynyń qatysqany jaıly málimdeme jasady. Osyǵan baılanysty mınıstrlik Qyrǵyz Respýblıkasy azamattarynyń qańtar oqıǵalaryna qandaı da bir qatysy baryn túbegeıli joqqa shyǵarady. Sonymen qatar, jappaı tártipsizdik faktisi boıynsha qylmystyq isterdi tergeý kezinde Qyrǵyzstannyń eki azamaty shartty merzimde jaza óteý túrinde jaýapqa tartyldy. Bul azamattar ózderine táýeldi emes mán-jaı boıynsha kezdeısoq jeke epızodqa tartyldy», - dep jazylǵan Syrtqy ister mınıstrliginiń resmı málimdemesinde.
Mınıstrlik Qyrǵyz Respýblıkasynyń basqa azamattarynyń jaýapkershiligi men kinási dáleldenbegenine basa nazar aýdardy.
«Qyrǵyzstannyń bir de bir azamaty Qazaqstandaǵy mıtıngilerge, jappaı tártipsizdik pen tonaýǵa qatysqan joq. Qyrǵyzstan Syrtqy ister mınıstrligi jáne Qyrǵyzstannyń shet elderdegi mekemeleri 2022 jylǵy qańtar oqıǵasynda Qazaqstandaǵy Qyrǵyz Respýblıkasy azamattarynyń quqyqtary men múddelerin qorǵaýdy qamtamasyz etý boıynsha jan-jaqty jumys júrgizdi, onyń ishinde 600-den astam qyrǵyzstandyq jedel túrde evakýatsııalandy», - deıdi mınıstrlik.
Buǵan deıin Qazaqstannyń Bas prokýrory Berik Asylov Májiliste Qańtar oqıǵalarynyń mán-jaıyn baıandaǵan edi.
Onyń ishinde Ózbekstan, Reseı, Qyrǵyzstan jáne Tájikstan azamattary da jappaı tártipsizdikke qatysqanyn aıtqan.
Foto: mfa.gov.kg