Qańtar oqıǵasyn qaıta boldyrmaý sharalary qabyldanyp jatyr - Tımýr Tájimbaev

ASTANA. QazAqparat – Barlyq memlekettik apparat qańtar oqıǵasyn qaıta boldyrmaý is-sharalaryn qabyldap jatyr. Bul týraly QR Bas prokýrorynyń birinshi orynbasary Tımýr Tájimbaev aıtty, dep habarlaıdy QazAqparat tilshisi.

«Qazir barlyq memlekettik apparat qańtar oqıǵasyn qaıta boldyrmaý is-sharalaryn qabyldap jatyr. Prezıdent saılaýaldy baǵdarlamasynda naqty tapsyrmalar berdi. Olar agrarlyq sektordy, ekonomıka salasyn, ınfraqurylymdyq damý, tsıfrlandyrýdy qamtıdy. Sonymen qatar, azamattardyń ál-aýqatyn, bilim sapasyn arttyrý, medıtsına, sot tóreligi men quqyq tártibine qatysty», - dedi ol Bas prokýratýranyń bıylǵy jumysyn qorytyndylaýǵa arnalǵan baspasóz máslıhatynda.

Sonymen qatar Bas prokýrordyń birinshi orynbasary basymdyq beriletin baǵyttardy da atady.

«Olar – azamattardyń konstıtýtsııalyq quqyqtaryn saqtaý, azaptaý, otbasylyq zorlyq-zombylyq, esirtki, alaıaqtyq jáne qarjy pıramıdasymen kúres. Aldaǵy ýaqytta prokýratýra organdary osy jáne basqa da Prezıdent tapsyrmalaryn sheshýge bar kúshin baǵyttaıdy», - dedi Tımýr Tájimbaev.