Qańtar oqıǵasy: raqymshylyqqa ilikkender keltirgen shyǵyndy óteı me

ASTANA. QazAqparat – Májilis depýtaty Gúlnar Bıjanova qańtar oqıǵasy kezinde bızneske shyǵyn keltirgen adamdardyń zalal ornyn toltyrýy mindetine qatysty pikir bildirdi, dep habarlaıdy QazAqparat tilshisi.

«Raqymshylyq boıynsha bosatý – ońaltý is-sharalary úshin negiz bolmaıdy. Bul zań jobasynda raqymshylyqty qoldaný zalaldyń bar-joǵyna qaramastan qarastyrylǵan. Biraq, raqymshylyqty iske asyrý zalal úshin jaýapkershilikten bosatpaıdy. Tıisinshe, jábirlenýshi jaqtyń bosatylǵan adamǵa zalaldy óteý týraly talap qoıýyna eshteńe kedergi bola almaıdy. Sonymen qatar, raqymshylyq qoldaný aldynda aıypty adam kinásin de, keltirilgen zalaldy da moıyndaýy kerek», - dedi G. Bıjanova Májilistiń jalpy otyrysynda depýtattardyń saýalyna jaýap bere otyryp.

Ol aqpan aıynan bastap memleket kásipkerlikke, shaǵyn jáne orta bızneske keltirilgen shyǵyndy ótep jatqanyn atap ótti. Salyq kodeksine engiziletin ózgeristerdi qaraý aıasynda iri kásipkerlik sýbektileriniń qańtar oqıǵasynda keltirilgen zalaldy óteýge jumsaıtyn shyǵyndaryn eki jyl ishinde shegerip tastaý usynylyp otyr.

«Atameken» UKP málimetinshe, bızneske keltirilgen jalpy shyǵyn 90 mıllıard teńgeden asqan.

«Aımaqtyq komıssııalar shyǵyndy óteý týraly ótinishterdiń barlyǵyn maquldady. Zııandy óteý úsh kózden, ıaǵnı Úkimet rezervinen, jergilikti bıýdjet jáne jeke qor qarajaty esebinen júzege asyrylady», - dedi depýtat.

Buǵan deıin habarlanǵandaı, Májilistiń jalpy otyrysynda palata depýtattary «Raqymshylyq jasaý týraly» zań jobasyn maquldady.