Qańtar oqıǵasy: Qylmys belgileriniń bolmaýyna baılanysty 7 is toqtatyldy

NUR-SULTAN. QazAqparat – Quqyq qorǵaý qyzmetkerlerine qatysty qylmystyq quramnyń bolmaýyna baılanysty 7 is toqtatyldy. Bul týraly Májilistiń jalpy otyrysynda qańtar oqıǵasyna qatysty máselelerdi qaraý kezinde Sybaılas jemqorlyqqa qarsy is-qımyl agenttiginiń tóraǵasy Oljas Bektenov málim etti, dep habarlaıdy QazAqparat tilshisi.

«Sonymen qatar arnaıy prokýrorlarǵa adamnyń qaıtys bolý faktisimen tirkelgen 8 qylmystyq is berildi. Sybaılas jemqorlyqqa qarsy qyzmet quqyq qorǵaý organdary qyzmetkerleriniń zańǵa qarsy áreketteri týraly kýálandyratyn obektıvti derekter anyqtalmaǵandyqtan, is-árekette qylmys quramynyń bolmaýyna baılanysty 7 qylmystyq isti toqtatty», - dedi O. Bektenov.

Osy oraıda ol agenttik qylmystyq isterdi tergeý kezinde Azaptaýlardy tergeý jónindegi Ystanbul hattamasynyń talaptaryn qatań ustanatynyn atap ótti.

«Bizdiń basty maqsatymyz – oqıǵalardyń búkil hronologııasyn anyqtaý jáne árbir ótinish boıynsha obektıvti quqyqtyq baǵa berý. Tártipsizdikter jappaı bolǵandyqtan, buǵan biraz ýaqyt qajet. Barlyq qylmystyq ister boıynsha tergeý jospary qurastyrylyp, onda tergeý-jedel is-sharalary kesheni qamtyldy», - dedi agenttik basshysy.

Budan buryn habarlanǵandaı, Oljas Bektenov qańtar aıyndaǵy oqıǵalardan keıin, quqyq qorǵaý organdaryna kúshtik qurylym qyzmetkerleriniń áreketterine qatysty aryzdar kelip túse bastaǵanyn aıtty.

Osy oraıda ol kúshtik qurylymdardyń qyzmetkerlerine qatysty 234 qylmystyq is tergelip jatqanyn aıtty.