Qańtar oqıǵasy kezinde jalǵan aqparat taratqan qostanaılyq sottaldy

QOSTANAI. QazAqparat – Qostanaı qalasynyń №2 sotynda qańtar oqıǵasy kezinde áleýmettik jeli arqyly jalǵan aqparat taratty dep aıyptalǵan Dıas Nurmaǵambetovtiń isi qaraldy, dep habarlady QazAqparat tilshisi.

Aıyptaý nusqasy boıynsha, sottalýshy «Protestnyı Kostanaı» telegram arnasynda jazbalar jarııalaǵan. Qańtardaǵy mıtıngiler kezinde ol polıtsııanyń narazylyq bildirýshiler jaǵyna ótip jatqany týraly habarlama taratqan. Bul, sottyń málimetinshe, qoǵamdyq tártipti buzý qaýpin týdyrǵan.

Prokýror «kópshilik is-sharalardy ótkizý kezinde» degen saralaý belgisin alyp tastady, ol Nurmaǵambetovtiń áreketin QK-niń 274-baby 2-bóligi 3-tarmaǵy boıynsha túpkilikti saralaýdy jáne sottalýshyǵa 2 jyl merzimge shartty túrde bas bostandyǵynan aıyrý túrindegi jaza taǵaıyndaýdy surady.

Alaıda, Nurmaǵambetov sotta kinásin moıyndamady.

«Jaza taǵaıyndaý kezinde sot aıyptalýshy Nurmaǵambetovtiń jaýapkershiligi men jazasyn jeńildetetin mán-jaılar retinde sottylyǵy men aýyrlatatyn mán-jaılardyń bolmaýyn eskerdi. Sot QK-niń 44-babynda kózdelgen jazanyń búkil merzimine probatsııalyq baqylaý belgileı otyryp, 1 jyl merzimge bas bostandyǵyn shekteý túrindegi jazany jáne mindetterdi belgiledi», - dep habarlady oblystyq sottan.

Sondaı-aq, qamaýda ustaý ýaqyty men úıqamaqtaǵy ýaqyt jaza merzimine kiredi.