Qańtar oqıǵasy kezinde búlikshilerdiń maqsaty bılikti basyp alý boldy – Berik Asylov

NUR-SULTAN. QazAqparat – Qańtar oqıǵasy kezinde bılikti basyp alý maqsaty boldy. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

«Aktsııalardyń túpki maqsaty bılikti zorlyq-zombylyq arqyly basyp alý boldy. Zań boıynsha mundaı is-qımyldar terrorızm aktisi retinde baǵalanady. Kóshede zorlyq-zombylyqty toqtatý men azamattardyń ómirin qorǵaý úshin quqyq qorǵaý jáne arnaıy organdardyń qyzmetkerleri qarý paıdalanýǵa májbúr boldy», - dedi Berik Asylov.

Onyń aıtýynsha, bul qadamdar quqyq qorǵaý qyzmeti týraly zańnamada qarastyrylǵan.

Budan buryn habarlanǵandaı, Bas prokýror qańtar oqıǵasy kezinde 11 aımaqta agressıvti toptar zorlyq-zombylyq satysyna ótkenin aıtty.

«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktıvti kúshterdiń arandatýyna boı bermeýge shaqyrdy. Alaıda, birneshe márte sabyr saqtaýǵa shaqyrýǵa qaramastan, qylmystyq jáne radıkaldy elementter belsendi de qatań áreketterge kóshti. 4-shi jáne 5-shi qańtarda azamattar jıyny agressıvti topqa aınalyp, 11 aımaqta zorlyq-zombylyq satysyna ótti», - dedi B. Asylov.