Qańtar oqıǵasy kezinde bir qatysýshy terrorıstik akt jasady – Bas prokýratýra

NUR-SULTAN. QazAqparat – QR Bas prokýratýrasy Qyzylorda oblysynda asa aýyr qylmys jasaǵan qańtar oqıǵasynyń bir qatysýshysyna qatysty tergeýdi aıaqtady, dep habarlaıdy QazAqparat tilshisi.

Bul týraly vedomstvonyń 1 qyzmet bastyǵynyń orynbasary Eldos Qılymjanov málim etti.

«Qyzylorda oblysynda asa aýyr qylmys jasaǵan qańtar oqıǵalarynyń bir qatysýshysyna qatysty tergeýdi aıaqtadyq. 5 qańtarda Qyzylorda qalasyndaǵy jappaı tártipsizdikter kezinde ol jáne onyń sybaılastary Ulttyq ulannyń «Kamaz» júrgizýshisin qatygezdikpen uryp-soqqan.Sodan keıin kúdikti áskerı tehnıkany aıdap ketip, qozǵaltqysh pedalyna kirpish qoıyp, mashınany áskerılerdiń qorshaýyna baǵyttap, qylmyskerdiń ózi «Kamaz» kabınasynan sekirip ketken, - dedi Eldos Qılymjanov OKQ ótken baspasóz máslıhatynda.

Onyń aıtýynsha, basqarýsyz qalǵan «Kamaz» úlken jyldamdyqpen kelip áskerılerdi qaǵyp, saldarynan adam qaza tapqan.

«Avtomashına úlken jyldamdyqpen áskerılerdi basyp, nátıjesinde soldat M. Qaısarov qaza tapty. Kúdiktiniń áreketi terrorızm aktisin jasaý boıynsha saralandy. M. Qaısarov otbasyndaǵy jalǵyz bala bolǵan, osy jyly ol 20 jasqa tolar edi», - dedi Bas prokýratýra ókili.

Buǵan deıin QR ІІM Tergeý departamentiniń basshysy Sanjar Ádilov qańtar oqıǵasy kezinde ásirese úsh óńirde nysandar qatty tonalǵanyn aıtqan edi.