Qańtar oqıǵasy kezinde bas kesý oqıǵalary bolǵan joq – Bas prokýror

ASTANA. QazAqparat – QR Bas prokýrory Berik Asylov qańtar kezindegi bas kesý oqıǵalary týraly suraqqa jaýap berdi, dep habarlaıdy QazAqparat tilshisi.

«Qańtar oqıǵasy kezinde qaskóıler adamnyń basyn kesip aldy degen qaýeset boldy. Mundaı fakti shynymen tirkeldi me?» dep surady jýrnalıster Májilis kýlýarynda.

«Qańtar oqıǵasy bastalǵanda ártúrli aqparat, ishinde jalǵan habarlar da boldy. Barlyǵy qańtardyń 4-inen 5-ine qaraǵan túni bastaldy. Elestetip kórińizshi, bir ýaqytta 8 qalaǵa shabýyl jasaldy, kóptegen nysandar, ákimdikter órtendi. Túrli aqparat kózderinen túrli habarlamalar, dezınformatsııalar boldy. Sondyqtan bas kesý týraly aqparatty tekserdik jáne bul habar rastalmady», - dedi Berik Asylov.

Buǵan deıin Bas prokýror tártipsizdikke qatysqandardy toqtatýǵa quqyq qorǵaý kúshiniń múmkindigi bolmaǵanyn, qalalyq ákimdiktegi órtte bir ofıtserdiń tirideı janyp ketkenin aıtqan edi.