Qańtar oqıǵasy kezinde 2 800-den astam qarý-jaraq pen oq-dáriler urlandy
Onyń atap ótýinshe, qańtar oqıǵasy kezinde «Beıbit jınalystar týraly» Zańǵa sáıkes óz talaptaryn ashyq túrde málimdeý boıynsha azamattardyń quqyqtary saqtaldy. Barlyq aımaqtarda túsindirý jumystary júrgizildi. Kóterilgen máseleniń naqty sheshimderi usynyldy.
«Biraq, ókinishke qaraı araǵa arandatýshylar qosyldy. Nátıjesinde, beıbit jınalys zańsyzdyqqa ulasty. Onyń ishinde avto jáne temirjoldar jabyldy. Vokzal men áýejaı qyzmetterine tosqaýyl qoıyldy. Qyzmettik avtokólikter órteldi. Memlekettik organdardyń ǵımarattary qorshaldy. Zańdy talaptarǵa baǵynbaı, qarsylyq kórsetildi. Sonyń ózinde, polıtsııa eshqandaı kúsh qoldanǵan joq. Bul jaǵdaıdy paıdalanyp, myńdaǵan búlikshiler polıtsııaǵa shabýyl jasady. Olardyń joǵary deńgeıdegi daıyndyǵy jáne uıymshyldyǵy baıqaldy», - dedi mınıstr.
Marat Ahmetjanovtyń atap ótýinshe, búlikshilerdiń áreketteri naqty tártippen uıymdastyrylǵan. Temirler, tastar, taıaqtar jáne taǵy basqa quraldar iske qosyldy.
«Osyǵan oraı, shuǵyl túrde azamattar men qyzmetkerlerdiń densaýlyǵyn saqtaý maqsatynda jappaı tártipsizdikti toqtatý qajet boldy. Tek osy saǵattan bastap polıtsııa qyzmetkerleri adamnyń ómirine qaýip tóndirmeıtin arnaıy quraldarmen jabdyqtaldy. Alaıda, búlikshiler bunymen toqtaǵan joq. Olar qarý-jaraq dúkenderine, polıtsııa bólimderine, basqa da memlekettik organdarǵa shabýyl jasady. 2 800-den astam qarý-jaraq pen oq-dáriler urlandy»,- dedi mınıstr.