Qańtar oqıǵasy kezinde 1414 jelisine 212 myńnan astam qońyraý túsken

NUR-SULTAN. QazAqparat – Qańtardaǵy jappaı tártipsizdik kezinde qazaqstandyqtar «1414» baılanys ortalyǵyna 212 myń márte habarlasqan. Onyń deni adamnyń joǵalýyna qatysty. Bul týraly «Azamattarǵa arnalǵan úkimet» memlekettik korporatsııasynyń basqarma tóraǵasy Súıenish Ábdildın málim etti, dep habarlaıdy QazAqparat tilshisi.

«Ótken jyly sáýirde «1414» biryńǵaı baılanys ortalyǵy bizdiń korporatsııanyń qaraýyna berildi. Atalǵan ortalyq jumysyn jetildirý baǵytynda aýqymdy jumys atqaryldy. Atap aıtqanda 7 qalada keńse ashylyp, ámbebap júıege kóshirildi. Sonymen qatar baılanys ortalyǵy operatordyń jaýabyn kútý ýaqyty 16 sekýndqa deıin qysqardy», - dedi Súıenish Ábdildın ortalyq kommýnıkatsııalar qyzmetinde ótken baspasóz máslıhatynda.

Korporatsııa basshysynyń dereginshe, bıyl ortalyq qyzmetkerleri azamattarǵa 4 mln-nan astam konsýltatsııa usynǵan.

«Bıyl qańtardaǵy elimizde bolǵan jappaı tártipsizdikter kezinde atalǵan «1414» jelisi azamattarǵa kómek kórsetti. Bizdiń ortalyq arqyly joǵalǵan azamattar jáne buzaqylar týraly aqparat kelip túsip, biz olardy quzyrly organdarǵa joldap otyrdyq. Tótenshe jaǵdaı kezinde «1414» baılanys ortalyǵyna 212 myńnan astam qońyraý kelip tústi. Onyń ishinde 2350 qońyraý habar-osharsyz ketken adamdardy izdeýge qatysty. Sol sııaqty 777 qońyraý tártipsizdik kezinde zardap shekkender jáne buzaqylyq áreketke qatysýshylarǵa qatysty», - deıdi ol.

Buǵan deıin habarlaǵanymyzdaı endigi ýaqytta qazaqstandyqtar jeke kýálik jáne tólqujatqa sýretke ózderi túsip, unaǵan fotony tańdaı alady. Atalǵan qyzmet jýyrda elordada iske qosylmaq.