Qańtar oqıǵasy boıynsha jaýapqa tartylǵan 275 adamnyń 31-i sottaldy

NUR-SULTAN. QazAqparat – Qańtar oqıǵasy boıynsha qylmystyq jaýap tartylǵan 275 adamnyń 244-ine bas bostandyǵyn aıyrýdy kózdemeıtin jaza taǵaıyndaldy, dep habarlaıdy QazAqparat tilshisi.

Bul týraly QR Іshki ister mınıstrliginiń Tergeý departamentiniń bastyǵy Sanjar Ádilov Ortalyq kommýnıkatsııalar qyzmetinde ótken brıfıngide aıtty.

«Sottar qaralǵan qylmystyq ister boıynsha aıyptalatyn adamdardyń kópshiligin bas bostandyǵyn aıyrýdy kózdemeıtin jazalarǵa sottady. Al bul 275 adamnyń ishinen 244 degen sóz. Taǵy 6 adamǵa qatysty qylmystyq ister taraptardyń tatýlasýyna baılanysty toqtatyldy. Mysaly, Almaty oblysynyń turǵyndary jappaı tártipsizdik barysynda Taldyqorǵan qalasy Polıtsııa basqarmasynyń zattar qoımasyna kirip ketip, somasy 195 myńnan artyq teńgege múlikti jymqyrǵan», - dedi Tergeý departamentiniń bastyǵy.

Aıtýynsha, Taldyqorǵan qalalyq sotynyń úkimimen sottalýshylardyń jeke basy men keltirilgen zalaldyń ornyn toltyrǵany eskerilip, olardyń bas bostandyǵy 3 jyl, 6 aı merzimge ǵana shektelgen.

«Taǵy bir mysal, Almaty oblysynyń úsh turǵyny jappaı tártipsizdik barysynda Almaty qalasyndaǵy Tóle bı kóshesindegi «Sıtı moll» saýda úıinen jalpy somasy 470 myń kıim-keshek pen sporttyq velosıpedti urlaǵan.

Almaly aýdanynyń soty olardyń jeke basy men keltirilgen zalaldyń orny toltyrylǵanyn eskere otyryp, olardy eki jylǵa bas bostandyǵyn shekteýge sottady», - dedi Sanjar Ádilov.

Buǵan deıin QR ІІM Tergeý departamentiniń basshysy Sanjar Ádilov qańtar oqıǵasy kezinde ásirese úsh óńirde nysandar qatty tonalǵanyn aıtqan edi.