Qańtar oqıǵasy boıynsha terrorızm babymen 46 adam kúdikke ilinip otyr

ASTANA. QazAqparat – Bas prokýrordyń orynbasary Áset Shyndalıev qańtar oqıǵasyna qatysty terrorızm babymen eki is qaralyp jatqanyn aıtty, dep habarlaıdy QazAqparat tilshisi.

«Qazirgi kezde terrorızm baby boıynsha eki is qaralyp jatyr. 24 uıymdasqan toptyń músheleri qylmystyq jaýapkershilikke tartylýda. Al terrorızm boıynsha 46 adam kúdikke ilindi», - dedi Á. Shyndalıev Senatta tilshiler saýalyna jaýap bere otyryp.

Sonymen qatar ol qańtar oqıǵasy kezinde qylmys jasaǵan adamdardyń arasynda basqa elderdiń azamattary bolǵanyn atap ótti. Degenmen Bas prokýrordyń orynbasary olar qaı memleketterden kelgenin naqty aıta almady.

Budan buryn habarlanǵandaı, qańtar oqıǵasyna qatysty 20-ǵa jýyq adam jappaı tártipsizdikti uıymdastyrýshy retinde kúdikke ilindi.

Sonymen qatar qańtar oqıǵasy kezinde zań buzǵan quqyq qorǵaý organdary qyzmetkerleriniń tek bireýine raqymshylyq jasalatyny málim boldy.

Búgin Senattyń jalpy otyrysynda «Raqymshylyq jasaý týraly» Zań qabyldandy.