Qańtar oqıǵasy boıynsha 35 myńnan astam jedel-tergeý is-qımyldary júrgizildi – Bas Prokýratýra
Májilistiń jalpy otyrysynda «Jańa Qazaqstan» depýtattyq tobynyń saýalyna bergen aýyzsha jaýabynda QR Bas prokýrory Berik Asylov osyndaı derek keltirdi.
«Ózderińiz biletindeı, Prezıdenttiń tapsyrmasy boıynsha Bas prokýratýranyń arnaıy prokýrorlarynyń basshylyǵymen vedomstvoaralyq jedel-tergeý toptary quryldy.
Búginde 35 myńnan astam jedel-tergeý is-qımyldary, onyń ishinde 20 myń tekserý, jaýap alý, tintý júrgizildi. 3,5 myń sot saraptamasy taǵaıyndaldy.
Búkil organdar boıynsha japy sany 766 kúdikti tutqyndalǵan. Olardyń basym bóligi 30 jasqa deıingi jastar, jumyssyzdar, joǵary bilimi joq adamdar», - dedi Berik Asylov.
Onyń sózine qaraǵanda, kúdikti retinde tutqyndalǵandardyń ishinde destrýktıvti dinı aǵymdardyń 19 jaqtaýshysy, tyıym salynǵan ekstremıstik uıymdardyń 27 belsendisi, uıymdasqan qylmystyq toptardyń 24 múshesi jáne kisi óltirgeni, urlaǵany, tonaǵany jáne qaraqshylyq jasaǵany úshin sottalǵan 113 adam bar.
«Mysaly, «Jabaıy Arman» dep atalatyn Jumageldıev pen onyń tobynyń 14 múshesi qamaýda.
Mundaı adamdardyń joǵaltatyn eshteńesi bolmady jáne olar ártúrli qylmystarǵa ońaı bardy – dúkenderdi qıratty, tonaýmen aınalysty, ákimshilik ǵımarattarǵa shabýyl jasady.
Jalpy, 22 myńnan astam adamnyń jasalǵan qylmystarǵa qatysy bar-joǵy tekserildi», -dedi Bas Prokrýror.