Qańtar oqıǵasy boıynsha 315 adamǵa qatysty 127 qylmystyq is tergelip jatyr

ASTANA. QazAqparat – Byltyrǵy qańtar oqıǵasy boıynsha 315 adamǵa qatysty 127 qylmystyq is tergelip jatyr. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

«Qazir 315 adamǵa qatysty 127 qylmystyq is tergelip jatyr. Olar boıynsha jedel-tergeý is-sharalary jalǵasýda. Tergeý nátıjesin mindetti túrde qoǵamnyń nazaryna jetkizetin bolamyz», - dedi B. Asylov.

«Arnaıy prokýrorlar 720 qylmystyq isti tergedi. Bul ister boıynsha tyıym salynǵan ekstremıstik toptardyń 25 múshesi ustaldy. Uıymdasqan qylmystyq toptardyń 42 múshesi qamaýǵa alyndy. Odan bólek, kúdiktilerdiń arasynda destrýktıvti dinı aǵymdardyń 8 jaqtaýshysy bar», - dedi Berik Asylov Májilistiń búgingi otyrysynda.

Bas prokýrordyń aıtýynsha, 126 adam kisi óltirý, urlyq, tonaý jáne qaraqshylyq jasaǵandary úshin buryn sottalǵan. Negizinen jappaı tártipsizdikke qatysýshylardyń kóbi – 35 jasqa deıingi adamdar.

Budan buryn habarlanǵandaı, Qańtar oqıǵasynan keıin raqymshylyq 1 095 adamǵa qatysty qoldanyldy.

Sonymen qatar, qańtardaǵy azaptaýlar týraly shaǵymdar boıynsha 329 qylmystyq is qozǵaldy.

Bas prokýrordyń aıtýynsha, burynǵy Qorǵanys mınıstri Murat Bektanov zańsyz buıryq bergen.