Qańtar oqıǵasy: bıznes sýbektilerge 14,6 mlrd teńge ótemaqy tólendi

ASTANA. QazAqparat – Qańtardaǵy jappaı tártipsizdikter kezinde zalal kelip, shyǵynǵa batqan bıznes sýbektilerge memlekettik ótemaqy tólendi. Bul týraly ІІM tergeý departamenti basshysynyń orynbasary Nurlan Dúısenbaev málim etti, dep habarlaıdy QazAqparat tilshisi.

«Qańtardaǵy jappaı tártipsizdikter kezinde memlekettik jáne jeke nysandardyń qıratylǵany belgili. Saldarynan memlekettik organdarǵa, kásipkerlerge jáne jeke tulǵalarǵa mıllıardtaǵan shyǵyn keldi. Mysaly, Almaty qalasynda 7 ańshylyq dúkeni, Tarazda 3 qarý dúkeni tonaldy. Sol sııaqty, sharýashylyq sýbektilerine 37,5 mlrd teńge zalal keltirilgen. Onyń deni Almatyǵa tıesili. Tártipsizdik saldarynan kásipkerlerdiń 34,3 mlrd teńgege múlki búlingen jáne urlanǵan. Búginde qańtar oqıǵasy kezinde zardap shekken bıznes sýbektilerine memleketten 14,6 mlrd teńge ótemaqy tólendi», - dedi Nurlan Dúısenbaev OKQ-de ótken brıfıngte.

ІІM ókiliniń málimdeýinshe, jappaı tártipsizdikter kezinde zardap shekkenderge memlekettik bıýdjet esebinen ótemaqy tóleýge kepildik beriledi.

«Qańtar oqıǵasy kezinde qurban bolǵandardyń jáne osal topqa jatatyn otbasylarǵa tergeý nátıjelerine qaramastan tólem óteý týraly sheshim qabyldandy. Sondaı-aq, «Qazaqstan halqyna» qory qaza tapqandardyń otbasylaryna (91 otbasy) 637 mln teńgege materıaldyq kómek kórsetti. Tártipsizdikter kezinde kúshtik qurylymnyń qaza tapqan barlyq qyzmetkeriniń otbasylaryna materıaldyq járdem berildi», - deıdi ol.

Odan bólek, spıker qańtarda qıraǵan Almaty qalasy, Almaty jáne Jambyl oblysy polıtsııa departamentteri ǵımaratyn qalpyna keltirýge Úkimetten 2,7 mlrd teńge qarajat bólingenin aıta ketti.