Qańtar oqıǵasy: Bir ofıtser tirideı janyp ketti

ASTANA. QazAqparat – Qańtar oqıǵasynda quqyq qorǵaý kúshteri tek arnaıy quraldardy qoldanýǵa tyrysty. Bul týraly QR Bas prokýrory Berik Asylov Májiliste aıtty, dep habarlaıdy QazAqparat tilshisi.

«Tártipsizdikke qatysqan kóp adamdy toqtatýǵa quqyq qorǵaý kúshteriniń múmkindigi bolmady. Onyń ústine, qyzmetkerlerdiń basym bóliginde qarý bolǵan joq. Olar sońyna deıin tek arnaıy quraldardy – sý atqyshtar, rezınalyq taıaqshalardy qoldandy. Biraq sol ýaqytta júzdegen tártip saqshylary jaralanǵan edi, onyń ishinde oqtan jaraqat alǵandar da boldy. Al bir ofıtser qalalyq ákimdikte bolǵan órtte tirideı janyp ketti», - dedi Berik Asylov Májilistiń búgingi otyrysynda.

Sondaı-aq, Bas prokýror jappaı tártipsizdik barysynda qaza tapqandarǵa erekshe nazar aýdarý kerektigin atap ótti.

«Mysaly, obektilerdi qorǵaý jáne lańkestikke qarsy operatsııa barysynda 238 azamat qaza tapty, olardyń 41 buryn sottalǵan. Bas prokýratýra tergeý barysynda barlyq aqparatty qaıta tekserip, 67 azamattyń jappaı tártipsizdikterge qatysqanyn, 142 adam terrorızmge qarsy operatsııa kezinde erekshe rejımdi buzǵanyn, 4 adam basqa quqyq buzýshylyqtar barysynda qaza tapqanyn anyqtady», - dedi ol.

Aıta keteıik, qańtardaǵy shabýyldy toıtarý kezinde, tótenshe jaǵdaı men antıterrorıstik operatsııa barysynda 238 adam qaıtys boldy. Onyń ishinde 41 adam buryn sottalǵan.

Bir kúnde 8 oblystyń ákimdigine shabýyl jasalǵan.

Sondaı-aq, B. Asylov qańtardaǵy tártipsizdikke 35 jasqa deıingi adamdar kóp qatysqanyn aıtty.

Foto: Reuters