Qańtar oqıǵasy: 12 myńnan astam adamnan jaýap alyndy

NUR-SULTAN. QazAqparat – Qylmystyq ister boıynsha 1,5 myńnan asa jeke jáne zańdy tulǵalar jábirlenýshi dep tanyldy. Bul týraly ІІM tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Іshki ister mınıstrligi qańtar oqıǵalaryn tergeý men eldegi quqyqtyq tártipti qamtamasyz etý boıynsha jumysty jalǵastyrýda. Qazirgi ýaqytta ishki ister organdary tergeýshileriniń qaraýynda 2729 qylmystyq is bar, olar boıynsha 255 adam kúzetpen ustalýda. Sonymen birge jasaǵan áreketiniń aýyrlyǵyn, jeke basynyń minezdemesin eske otyryp, sottar 140 adamǵa qoǵamnan alshaqtatýǵa baılanysty emes bultartpaý sharalaryn taǵaıyndady: úıqamaq - 62, kepil - 33, eshqaıda shyqpaý týraly qolhat - 45. Buryn atalǵandaı qylmystyq isterdiń negizgi bóligi kelesi qylmystar boıynsha tergelýde: urlyq - 1 844, qarýdyń zańsyz aınalymy - 343, múlikti qasaqana búldirý nemese joıý – 144», - dedi Sanjar Ádilov Ortalyq kommýnıkatsııalar qyzmetinde.

Onyń aıtýynsha, qylmystyq ister boıynsha 1,5 myńnan asa jeke jáne zańdy tulǵalar jábirlenýshi dep tanyldy.

«12 myńnan astam adamnan jaýap alynǵan, 2 myńnan astam ártúrli sot saraptamalary taǵaıyndalǵan. Sotqa deıingi tergeýdiń sapasy jáne onyń jedel aıaqtalýy erekshe nazarǵa alynǵan», - dedi S. Ádilov.