Qańtar oqıǵasy: 1 500 adam raqymshylyqqa iligedi

ASTANA. QazAqparat – Qańtar oqıǵasyna qatysqan jastardyń kóbi qateligin túsinip, ókinip júr. Bul týraly QR Bas prokýrorynyń birinshi orynbasary Tımýr Tájimbaev aıtty, dep habarlaıdy QazAqparat tilshisi.

«Qańtar oqıǵasy – elimiz úshin úlken qasiret. Ol kúnderi memleket tutastyǵy, Táýelsizdigi men qaýpsizdigi qater aldynda turdy. Prezıdent der ýaqytta sheshimder qabyldap, elimizdi saqtap qaldy. Memleket basshysy tapsyrmasymen bul oqıǵanyń sebepteri men saldary qaralyp jatyr», - dedi ol Bas prokýratýranyń bıylǵy jumysyn qorytyndylaýǵa arnalǵan baspasóz máslıhatynda.

Onyń atap ótýinshe, oqıǵanyń basty sebepteri – áleýmettik problemalar, jumyssyzdyq, kiristerdiń azaıǵany. Bul jaǵdaıdy destrýktıvti kúshter, krımınalıtet, radıkaldy elementter paıdalanyp ketken.

«Olar adamdardy is-júzinde agressııa men qatal áreketterge arandatqan. Tártipsizdik jasaǵan adamdardyń kópshiligi – jastar. Olar áreketteri qandaı aýyr saldarǵa ákep soǵatynyn túsinbegen. Kóp jastar óz qatelikterin túsinip, ókinip júr», - dedi Tımýr Tájimbaev.

Bas prokýrordyń birinshi orynbasary osyǵan oraı qarashada Prezıdent «Raqymshylyq týraly» Zańǵa qol qoıǵanyn atap ótti.

«Amnıstııa bir jarym myń adamǵa qatysty. Qazirgi ýaqytta 991 azamattyń jaza merzimi jeńildedi. 94 adam qylmystyq jaýaptan bosatyldy. Mynany eskere ketsem deımin, tártipsizdik uıymdastyrǵan adamdar, azaptaý, ekstremızm, terrorızm, memleketke opasyzdyq jasaǵandar amnıstııaǵa ilikpeıdi», - dedi ol.

Eske salsaq, buǵan deıin Qańtar oqıǵasyna qatysqan 1 myńnan astam adamǵa raqymshylyq jasalǵany týraly habarlaǵan bolatynbyz.