Qańtar oqıǵasynan keıin qırap qalǵan Almaty ákimdigi qalaı ózgerdi
Almaty ákimdigi ǵımaratynyń tarıhı kelbetin saqtaı otyryp, qalpyna keltirý jumystary aıaqtaldy. Eske salsaq, qalpyna keltirý jumystary ótken jyly qańtar oqıǵasy ótken soń, aqpan aıynda bastalǵan edi.
Ol kezde ǵımaratqa órtten 80% zalal kelgen edi.
6 qabat pen 4 pavılon otqa oranyp, órtke qarsy júıeniń iske qosylýy men tonaý saldarynan joǵarǵy qabattan sý aǵyp, jertóleler zardap shekken bolatyn.
Almaty ákimdiginiń tarıhı kelbeti saqtalyp, zamanaýı tehnologııa men qurylys standarty eskerilip jańǵyrtyldy.
«Ákimdik ǵımaraty qala úshin mańyzdy. Ol 1979 jyly salynǵan jáne sol kezde Qazaqstan boıynsha eń iri ǵımarat sanaldy. Sondyqtan ǵımarat úlken mańyzǵa ıe. Ony qalpyna keltirý kezinde biz tarıhı kelbetin saqtaýǵa tyrystyq», — deıdi Almaty ákimi apparatynyń basshysy Beıbit Shahanov.
Qasbette juldyzdyń ornyna beıbitshilik tutastyǵynyń, memleket pen otbasy negiziniń ulttyq sımvoly bolyp tabylatyn shańyraq beınelengen.
Rekonstrýktsııa kezinde birinshi kezekte ákimdik qyzmetkerleri men kelýshileriniń qaýipsizdigi eskerildi. «QazQSǴZI» AQ sarapshylary ǵımaratty seısmıkalyq tózimdilikke zerttep, usynystaryn aıtty, seısmıkalyq kúsheıtý boıynsha barlyq is-shara tolyq kólemde júrgizildi, órt qaýipsizdigi sharalary saqtaldy.
Almaty ákimdiginiń baspasóz qyzmetiniń málimetinshe, ǵımarattyń ishki bezendirilýinde otqa tózimdi janbaıtyn materıaldar paıdalanyldy, buryn bolmaǵan jańa tútin shyǵarý júıesi, órttiń órtti eskertý — mekenjaı júıesi ornatyldy.
Órt kezinde órttiń taralýyna jol bermeıtin arnaıy klapandar avtomatty túrde qosylady.
Sondaı-aq ǵımarattyń qaýipsizdik sharalaryn kúsheıtý úshin ǵımaratqa kirýdi baqylaý júıesi qoldanyldy jáne otqa tózimdi esikter, ǵımaratqa birinshi qabattardyń terezeleri arqyly ruqsatsyz kirýdi shekteıtin qosymsha japqyshtar, sonymen qatar ár qabatta jáne perımetri boıynsha beınebaqylaý kameralary ornatyldy.
Qyzmetkerlerdiń kirýi úshin týrnıkette bet-álpetti taný júıesi ornatylǵan.
Qurylys barysynda tıimdi energııa tutyný tehnologııasy qoldanylyp, jańa jylytý júıesine tolyǵymen aýystyryldy.
Barlyq ınjenerlik kommýnıkatsııa avtomattandyrylǵan jáne biryńǵaı dıspetcherlik pýnktke qosylǵan, bul jumysty baqylaýǵa jáne ǵımarattyń energııa tıimdiligin qamtamasyz etýge múmkindik beredi.
Dıspetcherler ozyq úlgidegi stantsııanyń kómegimen barlyq júıeni basqarady, tótenshe jaǵdaı týyndaǵan kezde jedel áreket etedi.
Ǵımaratty qalpyna keltirýdiń taǵy bir mańyzdy krıterııi ınklıýzıvti sheshimderdi engizý arqyly azamattardyń barlyq sanaty úshin jaılylyq pen kedergisiz ortany qamtamasyz etý boldy.
Atap aıtqanda, lıftiler, elektr kótergishter, múgedekterge arnalǵan jýynatyn bólmeler jáne mobıldiligi tómen toptarǵa arnalǵan arnaıy qurylǵy– belgiler, pandýstar, shaqyrý túımeleri, Braıl álipbıi paıda boldy.
Ákimdiktiń birinshi qabaty «Open space Almaty» bolyp qaıta jańartyldy. Bul qabyldaý bólmesi, kútý aımaǵy, kelissózder bólmesi, halyqty qabyldaý bólmesi, ana men bala bólmesi, balalarǵa arnalǵan oıyn alańy bar qoǵamdyq qabyldaý bólmesi bolyp tabylady.
«Úsh kabınetti biriktirip, qala turǵyndary kelip, ótinish bildirip, óz máselelerin qysqa merzimde sheshe alýy úshin open space jasadyq», — deıdi ATRIX Group qurylys kompanııasynyń bas dırektory Ámirjan Nábıev.
Rekonstrýktsııadan keıin kabınetterdiń aýdany ózgermedi. Otandyq óndiristi qoldaý úshin negizinen qazaqstandyq óndiristiń materıaldary, onyń ishinde jıhaz jáne esikter paıdalanyldy.
Kabınetterdiń konfıgýratsııasy, ólshemderi, ornalasýy ózgerissiz qaldy. Ǵımaratta barlyǵy 700 orynǵa eseptelgen 360 kabınet ornalasqan. Nysannyń jalpy aýdany 33 myń sharshy metrden asady.
Ǵımaratta 14 basqarma men ákimdik apparaty bolady.
Ǵımaratty qalpyna keltirýge respýblıkalyq bıýdjetten 17 mlrd teńge bólindi. Qalpyna keltirý jumystaryna myńǵa jýyq jumysshy tartyldy.
«Qosymsha qarajat suraǵan joqpyz. Bul — respýblıkalyq bıýdjet, rezervtik qordan beriletin transfert», — dedi Ámirjan Nábıev.
Búgingi kúni Almaty ákimdiginiń ǵımaraty qalpyna keltirilip, paıdalanýǵa daıyn.
Jyldyń basynda QazAqparat tilshisi ákimdik ǵımaratynda jóndeý jumystary qalaı júrip jatqanyn jazǵan bolatyn.