Qańtar-mamyrda óńdeý ónerkásibindegi óndiris 3,3 paıyzǵa artqan

ASTANA. QazAqparat – Osy jyldyń 5 aıynda taý-ken ónerkásibindegi óndiris kólemi 1,3 paıyzǵa joǵarylady. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Óńdeý ónerkásibinde oń ósim saqtalyp otyr. Óndiris kólemi 3,3 paıyzǵa artty. Kórsetkish ósimi 15 óńirde tirkeldi. Sonyń ishinde eń joǵarǵy ósimdi Almaty qalasy, Qostanaı, Soltústik Qazaqstan, Abaı oblystary kórsetti. Óńdeý ónerkásibi salalary boıynsha mashına jasaý óndirisiniń – 31,9, onyń ishinde avtomobıl jasaýdyń – 40,8 jáne elektr jabdyqtaryn jasaýdyń – 37,8 paıyzǵa artýy qamtamasyz etildi. Sondaı-aq ósim kelesi salalarda baıqalyp otyr: azyq-túlik óndirisi, munaı óńdeý ónimderi, qurylys materıaldary, sýsyndar óndirisi, plastmassa buıymdary, jeńil ónerkásibi», - dedi mınıstr.

Onyń dereginshe, taý-ken ónerkásibindegi óndiris kólemi 1,3 paıyzǵa joǵarylady. Bul rette munaı óndirý – 2,4, gaz óndirý – 1,3, ózge de paıdaly qazbalardy óndirý 20 paıyzǵa artty. Metall kenderin óndirý – 0,5, taý-ken ónerkásibinde qyzmet kórsetý – 7,3, kómir óndirý 8,5 paıyzǵa tómendedi.