Qańtar qyrǵyny boıynsha 1 300-den astam túrli saraptama taǵaıyndaldy

NUR-SULTAN. QazAqparat – Qańtar oqıǵasyna baılanysty 1 300-den astam medıtsınalyq, ballıstıkalyq jáne basqa sot-saraptamalyq zertteý taǵaıyndaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Taǵy da eskertemin, prokýrorlar aryz-shaǵymdar, sonymen qatar ınternet arqyly taraǵan aqparattardy tekserýde. Quqyq qorǵaý organdary qańtardaǵy oqıǵalardyń búkil mán-jaıyn anyqtaý úshin kóp ýaqytty talap etetin úlken jumys atqarýda. Búgingi kúnde 1 300-den astam medıtsınalyq, balıstıkalyq jáne basqa sot-saraptamalyq zertteý taǵaıyndaldy. Olardyń kóbi - kúrdeli saraptamalar, 2-3 aıǵa deıin sozylýy múmkin. Bul eń aldymen oqıǵa kezinde qaza bolǵan azamattarǵa qatysty mán-jaıdy anyqtaý, muqııat tekserý úshin qajet», - dedi ol ortalyq kommýnıkatsııalar qyzmetindegi brıfıng barysynda.

Onyń atap ótýinshe, tergeýshiler 1500-ǵa jýyq oqıǵa bolǵan oryndy qarap shyqqan.

«10 myńnan astam tergeý amaly júrgizildi. 1 279 tulǵa jábirlenýshi bolyp tanyldy. Atqarylatyn jumys aýqymy óte kóp. Sol úshin tergeý nátıjesin kútip, sabyr saqtaý qajet. Tergeý amaldarynyń, saraptama nátıjesiniń negizinde ǵana ár kúdiktiniń is-áreketine quqyqtyq baǵa beriledi. Al túpkilikti, ıaǵnı kinániń bar-joǵy, jazanyń kólemi týraly sheshimdi tek sot qabyldaıdy. Sondyqtan qazaqstandyqtardy júrgizilip jatqan jumysqa túsinistikpen qarap, tek resmı málimetterge senýge jáne jalǵan aqparat taratpaýǵa shaqyramyn», - dedi Eldos Qılymjanov.