Qańtar kezinde qırap qalǵan Promenade saýda ortalyǵynyń taǵdyry ne bolady

ALMATY. QazAqparat - Almatyda qańtar oqıǵasy kezinde zardap shekken Promenade saýda ortalyǵy qaıta jańǵyrtylady. Bul týraly Almaty ákimi Erbolat Dosaev Almaly aýdanynyń turǵyndarymen kezdesý kezinde aıtty, dep habarlaıdy QazAqparat tilshisi.

Kezdesý kezinde qala turǵyny qańtar oqıǵasy kezinde zardap shekken Promenade saýda ortalyǵyna qatysty suraq qoıdy.

«Bul saýda ortalyǵynyń ary qaraıǵy taǵdyry ne bolmaq? Qańtar oqıǵasy ótkeli bir jarym jyldan asty. Alaıda saýda ortalyǵyna kireberis tusta búginge deıin lentalar ilingen jáne «kirýge bolmaıdy» degen jazý tur», - dep surady qala turǵyny.

Erbolat Dosaev Promenade saýda ortalyǵy kelesi jyly jańǵyrtýdan ótetinin aıtty.

«Saýda ortalyǵynyń ıeleri maǵan aldyn ala jobasyn kórsetti. Olar búginde tanymal fýdholl formatyn negizge alyp otyr jáne saýda ortalyǵynyń dızaınyn retke keltirgeli júr. Sondaı-aq bul jerge Sport saraıy men Ortalyq stadıon jaqyn ornalasqan. Usynǵan jobalary jaman emes. Endi ıeleri qajetti qujattamany jınap, qala keńesine barady. Osydan soń qala turǵyndary men týrısterdi qyzyqtyratyn jańa nysan paıda bolady dep oılaımyn. Men bul ıdeıany qoldadym. Kelesi jyly jumys óz ýaqytynda bastalady dep úmittenemin», - dedi Erbolat Dosaev.