Qańtar qasireti: 7 medıtsına qyzmetkeri zardap shekti

NUR-SULTAN. QazAqparat – Qańtar oqıǵalary kezinde 7 medıtsına qyzmetkeri zardap shegip, 46 jedel járdem kóligi zaqymdandy. Bul týraly QR DSM Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Baıserkın aıtty, dep habarlaıdy QazAqparat tilshisi.

«Jalpy, atalǵan kezeń ishinde 20 densaýlyq saqtaý nysanyna shaýyl jasaldy. Onyń ishinde Almaty qalasynda 5 statsıonar, MSAK-tyń 1 nysany, 14 dárihana bar. Osy aralyqta 7 medıtsına qyzmetkeri, onyń ishinde 5-eýi Almatyda, bireýi Shymkentte jáne taǵy bireýi Almaty oblysynda zardap shekti», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, 46 jedel járdem kóligi zaqymdandy. Zańymdanǵan kólikterdiń basym bóligi Almaty qalasynda – 32. Sonymen qatar 4 kólik jaramsyz bolyp qaldy.

«Tótenshe jaǵdaı kezinde qannyń jetkilikti kólemin qamtamasyz etý úshin elordadan Almaty qalasyndaǵy respýblıkalyq qan ortalyǵyna shamamen 360 doza qan jetkizildi. Bul ahýal ýshyqqan jaǵdaıda qoldanýǵa arnalǵan qor jasaý úshin jasaldy. Sonymen qatar Іshki ister mınıstrligimen «SQ Farmatsııa» kompanııasynyń Almaty, Shymkent, Nur-Sultan, Aqtóbe qalalaryndaǵy iri qoımalarda turǵan dári-dármekti táýlik boıy qorǵaý boıynsha jedel is-shara qabyldandy. Ol jerde tegin medıtsınalyq kómektiń kepildendirilgen kólemine kiretin barlyq dári-dármek saqtalady. Sonymen qatar narkotıkalyq jáne psıhotropty dárilik zattar da bar», - dedi komıtet tóraǵasy.

Baýyrjan Baıserkınniń atap ótýinshe, atalǵan kezeńde qaýyrt jeli uıymdastyryldy. Olarǵa 4 myńnan astam qońyraý tústi.