Qańtar: El boıynsha 400-den asa avtokólik búlingen

ASTANA. QazAqparat – Bas prokýratýra «Qańtar oqıǵasy: Derek pen dáıek» derekti fılminde tergeý nátıjesinde anyqtalǵan tyń málimetterdi jarııa etti. Onyń ishinde Qańtarda el boıynsha qansha avtokólik búlingeni týraly derekter bar, dep habarlaıdy QazAqparat tilshisi.

Málim bolǵandaı, qasiretti qańtarda elimiz boıynsha 400-den asa avtokólik búlinip, joıylǵan. Onyń ishinde 346 kólik ishki ister organdaryna tıesili.

Munymen qosa, derekti fılmde oıran salýshylardyń áreketin toqtatpaq bolǵan polıtsııa qyzmetkeri Arman Baıysbaev qarýly qylmyskerlerdiń adamdarǵa aıaýsyz zábir kórsetkenin aıtty.

«Sol jerde óldim dep oıladym, aıamady. Bizde qarý bolmady. Bizde tek kaska men qalqan ǵana boldy. Negizi biz qarapaıym halyqqa qarý qoldanbaımyz», - dep esine aldy tártip saqshysy.

Qosa keteıik, buǵan deıin Bas prokýratýra búlikshilerdiń qalaı jınalǵany jáne olardyń júrý baǵyty qalaı uıymdastyrylǵanyn jarııalaǵan bolatyn.

Vedomstvo málimetinshe, búlikti uıymdastyrýshylar naqty josparǵa saı áreket etken. Máselen, Almaty qalasynda jınalatyn eki oryn belgilengen. Onyń biri qalanyń batysyndaǵy – «Almaty Arena» sport keshininiń mańy, ekinshisi – shahardyń shyǵysyndaǵy «Halyq Arena» kesheniniń alańy. Eki jerde de jınalatyn ýaqyt birdeı – keshki saǵat 18:00-20:00 aralyǵy. Keıin 21:00-de olar ákimdik ǵımaratyna bettegen. Abaı, Tóle bı sııaqty kóshelermen júrip, jol boıy jolyqqandardy qatarǵa qosyp otyrady. Respýblıka alańyna jetkenshe, adam sany 10 myńǵa jýyqtaıdy. Taıaq, armatýra, dýbınka, balta jáne jarylǵysh zattarmen qarýlanǵan búlikshiler polıtsııa qyzmetkerleri men áskerılerge shabýyl jasaǵan.