Qańtar aıynda memlekettik bıýdjetke 1,5 trln teńge tústi

ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev 2023 jylǵy qańtardaǵy memlekettik qarjynyń atqarylýyn baıandady, dep habarlaıdy QazAqparat tilshisi.

Mınıstrdiń aıtýynsha, memlekettik bıýdjetke 1,5 trln teńge shamasynda kiris tústi nemese jospar 144%-ke oryndaldy.

«Odan bólek, respýblıkalyq bıýdjetke 1,1 trln teńge tústi nemese jospar 139%-ke oryndaldy. Kirister boıynsha jospar 310 mlrd teńgege, onyń ishinde salyqtar – 302 mlrd teńgege asyra oryndaldy», - dedi E. Jamaýbaev Úkimettiń búgingi otyrysynda.

Salyqtar boıynsha asyra oryndaýdyń negizgi somasy korporatıvtik tabys salyǵyna, qosylǵan qun salyǵyna jáne shıki munaıǵa eksporttyq keden bajyna tıesili.

Korporatıvtik tabys salyǵy boıynsha jospardyń asyra oryndalýyna 382 iri salyq tóleýshi boıynsha málimdelgen avanstyq tólemderdiń byltyrǵy qańtardan 48,8%-ke nemese 53 mlrd teńgege ósýi áser etken.

«Qosylǵan qun salyǵy boıynsha jospardyń asyra oryndalý faktorlary: taýarlardy, jumystardy jáne kórsetiletin qyzmetterdi satý aınalymynyń ósýi; qosylǵan qun salyǵyn tóleýshilerdiń 18%-ke ósýi; ótken jylǵy qańtarmen salystyrǵanda úshinshi elderden ımport kóleminiń 84%-ke ósýi», - dep túsindirdi Qarjy mınıstri.

Sonymen birge, shıki munaıǵa eksporttyq keden bajy boıynsha jospardyń asyra oryndalýy negizinen AQSh dollaryna shaqqanda teńge baǵamynyń 6,6%-ke tómendeýine de baılanysty boldy.

Aıta keteıik, Qańtar aıynda Qazaqstan ekonomıkasy 5,6% ósti.