Qańtar aıynda elimizdegi turǵyn úı naryǵynda baǵanyń ósýi baıqaldy

ASTANA. QazAqparat - QR Ulttyq ekonomıka mınıstrligi Statıstıka komıtetiniń habarlaýynsha, 2016 jylǵy qańtarda turǵyn úı naryǵyndaǵy baǵanyń ósýi baıqaldy.

Atap aıtqanda, aǵymdaǵy jylǵy qańtarda ótken aımen salystyrǵanda abattandyrylǵan turǵyn úılerdi alyp satý baǵalary 3,2 paıyzǵa, abattandyrylmaǵan turǵyn úılerdi satý - 2,9 paıyzǵa, jańa turǵyn úılerdi satý - 1,6 paıyzǵa joǵarylaǵan. Al abattandyrylǵan turǵyn úıdi jalǵa alý tólemi de ósip, ol 1,4 paıyzǵa joǵary boldy.

Keltirilgen málimetterge qaraǵanda, jańa turǵyn úılerdi satý baǵasy sharshy metrine 260 660 teńgeni quraǵan. Al abattandyrylǵan turǵyn úıdiń sharshy metri 196 023 teńge bolyp otyr. Esepti kezeńde abattandyrylmaǵan turǵyn úıdiń naryqtaǵy ortasha baǵasy sharshy metrine 114 649 teńgege jetti.